Nalunaarut nutaaq: Kalaallit pisinnaatitaaffii Danmarkimi kommunini isiginiarneqanngitsut

Danmarkimi kommunit kalaallit pisinnaatitaaffiinik eqqarsaatiginninngippallaarput. Tamanna isummersuisinit Justitiamit nalunaarusiami nutaami inerniliunneqarpoq. 

- Kalaallit immikkut pisinnaatitaaffeqarnerat ilisimaneqarpallaanngilaq, tamannalu maani Danmarkimi najugaqartugut pisinnaatitaaffiit taakku qulakkeerneqarnissaannut pisussaaffeqarpugut. Peqataatinneqarnissaannullu aamma pisussaaffeqarluta, Justitiami inatsisilerinermi pisortaq Mikele Schultz-Knudsen oqarpoq. 

Nalunaarummi kalaallit Danmarkip kommuneqarfiinut pigaangamik inatsisitigut isumannaatsuunerat misissorneqarpoq.   

Tassani kalaallit Danmarkimi innuttaasut kommunimilu sullissisut apersorneqarnerannik kiisalu Danmarkimi Naatsorsueqqissaartarfimmit allagaatinillu takunnissinnaatitaanermi paasissutissat tunngavigineqarput. 

Misissuinermi kommunit assigiinnginnerujussuat aamma takutinneqarpoq. 

- Kommunit sammisamut tassunga tunngatillugu sullissinerat assigiinngitsorujussuuvoq. Kommunit ilaat assersuutigalugu, oqalutseqarnikkut qaqutigorujussuaq ikiorsiisarput ilaalli misilittagaqarnerulersimapput kalaallinullu tunngatillugu immikkut suliniuteqarlutik, Mikele Schultz-Knudsen oqarpoq.  

Oqaatsit ilitsoqqussat atorlugit ilinniartinneqarsinnaatitaaneq

Justitiap ilaatigut misissugaa tassaavoq, Danmarkimi meeqqanut kalaallinut oqaatsit ilitsoqqussaat atorlugit ilinniartitsineq.

Inatsimmi allaqqasoq naapertorlugu, kommunit meeqqat 12-it eqimattani ataatsini katersorsinnaappatigit kalaallisut ilinniartitsinissamik neqeroortussaatitaapput.

- Kommunilli meeqqanik kalaallinik 12-inik katersuisinnaasimanngillat, Mikele Schultz-Knudsen oqarpoq. 

Københavnip Kommunia kalaallisut ilinniartitsinissamik kisimi neqerooruteqartuugallarpoq. 

Tamanna Københavnip Kommuniani Meeqqanut Inuusuttunullu Ataatsimiititaliap ukiup siuliani aalajangernera pissutaavoq, tassani meeraq ataaseq eqimattami ataatsimi peqataanissamut nalunaarnera naammattussaatinneqarpoq. Taamaalilluni kommunip meeqqat 12-it peqataasariaqarnerannut piumasaqaat malinngilaa.  

Meeqqanulli kalaallinut nunap sinnerani najugaqartunut neqeroorut atuutinngilaq. Tamanna siunissami ungasinnerusumi sunniuteqarsinnaavoq, meeqqammi oqaatsit ilitsoqqussatik atorunnaarsinnaavaat, Mikele Schultz-Knudsen naliliivoq.  

- Pisinnaatitaaffik piviusumik atuutinngilaq, pissutigalugu meeqqat kalaallit ilitsoqqussaralugu oqaatsitik atorlugit ilinniartinneqarneq ajoramik, taanna oqarpoq. 

Oqaatsitigut pisinnaatitaaffiit tungaatigut arlalitsigut ajornartorsiuteqartoqarpoq. Assersuutigalugu pappilissat kalaallisut nutserneqartarnerat qaqutigoorpoq, Mikele Schultz-Knudsen oqarpoq. 

Tamanna pingaarutilinnik aalajangiisoqarnissaanut pisariaqarsinnaavoq, assersuutigalugu isumaginnittoqarfimmi aalajangiisoqassatillugu.

- Innuttaasoq danskisut paasisinnaanngitsoq nalunngikkaanni pappilissat nutserneqarnissaat pingaaruteqarpoq, tassami innuttaasup sumik aalajangiisoqarnersoq nalunngittussaavaa tassuunatigullu assersuutigalugu naammagittaalliuuteqarsinnaalluni, Mikele Schultz-Knudsen oqarpoq. 

Sulianik nassiussinissaq amigaataasoq

Justitiap susassaqarfik alla misissuiffigisaa tassaavoq Danmarkimi nuna tamakkerlugu siunnersuinermik suliaqarfik (VISO), taassuma kalaallit meeqqat Danmarkimi pinngitsaaliissummik inissinneqarsimasut pillugit suliat misissuiffigineqaqqinnissaat suliassaraa.

Kommunit pinngitsaaliissummik inissiinerit pillugit suliat atuuttut, angajoqqaat piginnaasaannik misissuinernik isornartorsiorneqangaatsiartunik atuiffiusimasut nassiunnissaat pisussaaffigaat.

Misissuinerit danskit kulturiannik oqaasiinillu tunngaveqartumik suliaanerat pissutigalugu kalaallinut angajoqqaanut atorneqartarnerat pillugu isornartorsiorneqarnikuupput.

Naallu inatsisip atuutilerneranit ukioq ataaseq sinnereeraluaraa kommunit tamarmik sulianik nassiussinissaq suli naammassinngilaat.

- Suliani ukunani sulianik sulianut aaqqissuussivinni nassaarniartoqarnerani meeraq ukiumi ataatsimi inisseqqaneqaqqippoq. Tamanna soorunami sivisoorujussuusoq isumaqarpugut, Mikele Schultz-Knudsen oqarpoq, nangillunilu:

- Tunngaviusumik meeqqat piviusumik angajoqqaaminnut uteqqinneqartussat pineqarsinnaapput.

Danskit kalaallillu kommuniisa akornanni aqqut ajornakusoortoq

Nalunaarusiap danskit kalaallillu kommuniisa akornanni attaveqaqatigiinnermi ajornartorsiuteqarnera aamma uparuarpaa.

- Kommunit kalaallit kommuniinik attaveqarnissamut ersarissumik aqqutissaqaratillu kimut attaveqarnissap paasiniarnissaata ajornakusoornerannik oqaaseqarnerat tupaallaatigaara, Mikele Schultz-Knudsen oqarpoq.

Tamanna innuttaasunut toqqaannartumik kinguneqarsinnaavoq.

- Assersuutigalugu kalaallit kommuniini siusinaartumik soraarnerussutisiaqalersinneqarsimalluni danskit kommunianut nuukkaanni uppernarsaatinik nassiussinissaq pisariaqarsinnaavoq, taanna oqarpoq.

Nakkutiginninneq pitsaanerusoq qaninnerusumillu suleqatigiinneq

Justitiap nalunaarusiamini ajornartorsiutaasunut aaqqiissutissanik arlalinnik innersuussuteqarpoq.

Isummersuisit naapertorlugit Naammagittaalliuteqartarfik kommuninik nakkutilliisuusoq inatsisitigut isumannaatsuutitsinermi uuttuummik pilersitsisariaqarpoq. Tamanna kommunit kalaallit Danmarkimiittut pisinnaatitaaffiinik malinninnerannik nakkutiginnissinnaanissamut periarfissiissaaq.

Kalaallit meerartaannik inissiinermi sulianik suliareqqiinermut inatsimmut tunngatillugu ersarinnerusumik piffissaliussisoqarnissaa Justitiap innersuussutigaa. Kommunit taamaalillutik suliat qaqugu kingusinnerpaamik nassiussinissaannut aalajangersimasumik ulluliisoqariissaaq.

- Taamaalilluni suliat tamarmik paasineqarlutillu suliarineqarnerat ilisimaneqassaaq, Mikele Schultz-Knudsen oqarpoq.

Tamatuma saniatigut isummersuisit danskit kalaallillu kommuniisa akornanni qanimut suleqatigiittoqarnissaa innersuussutigaat.

Justitiallu kommunit kalaallinit najugaqarfiunerpaasut najukkami siunnersuisoqatigiinnik pilersitsinissaat innersuussutigaa.

- Taamaaliornikkut kommunini ataasiakkaani kalaallit najukkamiittut pisinnaatitaaffiisa eqqumaffigineqarnissaat, tusarneqarnissaat peqataasinneqarnissaallu qulakkeerneqarlunilu kommune sumiiffinni taakkunani ajornartorsiutaasut pillugit pitsaanerpaamik aaqqiissutissarsisassaaq, Mikele Schultz-Knudsen oqarpoq.

Kalaallit 17.000-t missaanniittut Danmarkimi najugaqarput.