Politikerit: Sakkortunerusumik pillaaneq ersersitsiniarneq pingaarutilik

Pinerluttulerinermik inatsisip aaqqissuuteqqinnissaa siunertaralugu politikkikkut siunnersuutit marluk Siumumiit Demokraatiniillu saqqummiunneqarput.

Demokraatit naalagaasuuugunik inatsit danskit pillaanermik inatsisaanut assingulerulersikkusukkaluarpaat, pinerluttulerinermullu inatsimmi pineqaatissiinermi sinaakkusiinissaq Siumumiit eqqunniarneqarpoq. 

Allannguutilli eqqartuussinerni annerusumik allannguutinik kinguneqarnavianngitsut, eqqartuussinermik suliallit KNR-imut oqaatigereerpaat.

Taamaammallu inatsimmik allannguinerup politikikkut inissisimanerinnarmik ersersitsinerunissaa, politiini unnerluussisussaatitaasut pisortaata Mariam Khalilip KNR-imut nassuiaatigaa. 

Tamatumali anguneqarnissaa politikerit taakku marluk siunertaraat.

- Pinerlunnerit kingunerisinnaasaasa sakkortussusaat inuiaqatigiinnut ersersikkusunnarpoq, Anna Wangenheim Demokraatineersoq oqarpoq. 

Kuno Fenckerilu isumaqataavoq: 

- Inuiaqatigiit inissisimanerat, eqqartuinerat misigissusaallu aallaavigalugit suut akuerineqarsinnaanerinik uagut politikerit ersersitsinissarput pingaaruteqarpoq. 

Pinerlineqartut qitiutillugit eqqarsariaaseq nutaaq

Pinerluttut eqqarsaatigivallaarunnaarlugit pinerlineqartut eqqarsaatigineqarnerulertariaqartut politikerit taakku isumaqarput. 

- Pinerluttulerinermut inatsimmi pinerluttup inissisimanera ukiorpassuarni ukkatarineqarsimavoq, tamannalu immini ajunngikkaluarpoq. Pinerluttut aqqusaarsimasaat aqqusaagassaalu assigiinngitsut nalilersortuartassavagut. 

- Pinerlineqartulli annerusumik eqqarsaatigisariaqarpagut, taakkumi aamma illersugassaraagut. Inatsiseqarnermi naapertuilluartoqarnera taakku aamma misigissavaat, Kuno Fencker oqarpoq. 

Taamalu eqqarsarnermi politikerit taakku isumaqatigiiffaaripput. Pillaanermik inatsimmik atuilernikkut pinerlineqartut illersorneqarnerat politikkikkut ersarissumik takutinniarneqarpoq, pinerlunnerullu sakkortunerusumik qisuariarfigineqartalernissaa siunnersuuteqartup Demokraatineersup siunertaraa. 

Inoqarfiit minnerit eqqarsaatigissagaanni tamatuma anguneqarnissaa aamma pingaaruteqarluinnartoq taanna isumaqarpoq. 

- Meeqqanik kinguaassiutitigut atornerluisimasup qaammatialunnguit qaangiunneranni aniguisarnissaa ilumoorsinnaanngilaq. Inuiaqatigiit ima ikitsigaagut, pinerluttoq pinerlisaalu aqqusinermi imminnut naaperiaannaallutik tamannalu inuiaqatigiinnut toqqissisimananngilluinnarpoq allanngortinneqartariaqarlunilu, Anna Wangenheim oqarpoq. 

Utaqqisummi qanoq pineqassappat? 

Sakkortunerusumik pineqaatissiisalernissamik kissaateqarneq piviusunngortinneqassappat ajornartorsiut ilisimaneqarluartoq iliuuseqarfigineqartariaqassaaq, nunatsinnimi pinerluuteqarsimasunut inissinneqarnissamut utaqqisoqarpoq. 

Pinerluuteqarsimasunut isumaginnittoqarfiup kisitsisaataasa 2023-mi maajimeersut pineqaatissinneqarsimasunut inissinneqarnissamut utaqqisut 69-iusut takutippaat. Pineqaatissiinerit sivisunerulissappata ajornartorsiutip tamatuma qanoq aaqqinneqarnissaa pillugu politikerit taakku aperineqaramik ersarilluinnartumik akissutissaqarput: 

- Sakkortunerusumik pillaasalernissamut innuttaasullu illersorneqarnissaannut utaqqisoqarnera utoqqatsissutaassanngilaq, Anna Wangenheim oqarpoq. 

- Pineqaatissiinermi sinnaakkuteqarneq pinerluuteqarnissamut qunulersitsippat, pinerluttut inissiivinniittussat ikilissapput.

Siunersuutillu suliarineqarnerata kingunissai qanoq ikkaluarpataluunniit, pinerluuteqarnermut inatsisip ajalusoorsimanera politikerit taakku isumaqatigiissutigaat.