Issittumi Tunngaviusumik ilinniagaq sapaammi ammassasoq
Issittumi Tunngaviusumik Ilinniarfimmi ilinniartut siulliit 22-t ukioq manna sapaammi maajip ulluisa tallimaanni ilinnialissapput, Kangerlussuarmi ilinniarfimmi nutaami ilinnialissallutik.
Upalungaarsimaneq sakkutuutullu piginnaasaqarneq ukkataralugit ilinniarneq aallarnerneqartassaaq, ilinniarnerullu naammassiartulernerani suleqatigiissinnaaneq inuttullu ineriartornissaq ukkatarineqartassallutik.
Ikuallattoqartillugu qamisaanermik tunngaviusumik ilinniagaqarneq, politiinullu ikiortitut sulineq aamma ilinniarneqartarput, Kalaallit Nunaanni Upalungaarsimasut Kalaallit Nunaannilu Politiit taakkunani ilinniartitsisuusarlutik.
Danmarkip illersornissamut ministereqarfia tusagassiorfinnut taama nalunaaruteqarpoq.
- Kalaallit Nunaanni inuusuttut uaplungaarsimanermik annaassiniartarnermilu suliassanik ilinniarsinnaalernerisigut Issittumi Tunngaviusumik ilinniarfik pingaarutilittut inissisimalissaaq. Ilinniareernerullu naammassineqareernerani piginnaasat illersornissaqarfimmi atorneqarsinnaalissapput, Danmarkip illersornissamut ministeria Troels Lund Poulsen oqarpoq.
- Amerlasuut ilinnialernissamik soqutiginnillutik qinnuteqarsimammata illersornissamut ministeritut taamaammat nuannaarutigaara, ilinnialersussallu siulliit Kangerlussuarmi aallartissinnaanngornerat nuannaarutigaara, illersornissamut ministeri oqarpoq.
Issittumi Tunngaviusumik Ilinniarneq Kalaallit Nunaanni najugalinnut tulluarsagaavoq, upalungaarsimanermik Kalaallit Nunaanni suliassanut tulluarsagaalluni. Ilinniartut illersornissaqarfimmi ilinniaqqinnissamut aamma tunngavissinneqassapput.
- Issittumi Tunngaviusumik ilinniartitaanerup ammarneqarnera nuannaarutissaavoq, Kalaallit Nunaanni inuusuttut upalungaarsimanermi piginnaasaqalerlutillu sulilersinnaalissammata, Naalagaaffinngornissamut nunanullu allanut naalakkersuisoq Vivian Motzfeldt oqarpoq.
- Ilinnialernissamut soqutiginnittut ima amerlatigipput ilinniarnerup aappaagu annertusineqarnissaa, illersornissamut ministerilu isumaqatigiissutigilereerparput. Inuusuttut nunamik piginnittussaanermut atatillugu suleqataalersinnaanerat, Issittumi Tunngaviusumik ilinniarnerup ammarneqarneratigut periarfissaalerpoq. Nunanut allanut-, sillimaniarnermut illersornissamullu politikkerisatsinnut nutaamut naapertuuppoq, Vivian Motzfeldt oqarpoq.
