Madonna Brasiliami Copacabanami tusarnaartitsimmat inuit 1,6 millionit tusarnaariartut

Tusaamasarsuup Madonnap nuannarinnittaasa Madonnap tusarnaartitsinissaanut qilanaarsimassagunarput, arfinininngornermilu tusarnaartitsinerani pakatsisinneqarsimanavianngillat.

Madonnami Brasiliami Rio de Janeiromi Copacabanami akeqanngitsumik tusarnaartitsivoq, inuit 1,6 millionit tusarnaariarlutik.

Nutaarsiassaqartitsivik Reuters taama allaaserisaqarpoq.

Inuit 1,5 millionit pallillugit tusaamasarsuup 65-inik ukiullip tusarnaartitsinissaanut najuunnissaat ilimagineqarsimavoq. Inuillu ilimagisamit amerlanerusut tusarnaariarput, amerikamiup "The Celebration Tour"-imik taallugu tusarnaartitsisaqattaarnera naggaserneqarluni.

Madonna Copacabanami sissap sinaani tusarnaartitsivoq, Europami Amerika Avannarlermilu katillugit 80-eriarluni tusarnaartitsisarnermini marloriaataatut angitigisumi tusarnaartitsilluni.

Upalungaarsimasuutitarpassuaqartoq

Inuppassuit tusarnaariassangatinneqarnerat pissutaalluni Brasiliami oqartussat upalungaarsimasuutitaqarput. Qatserisartut Copacabanimi 30 gradit sinnerlugit kiannera pissutigalugu tusarnaarianut imermik serpartaapput.

Nipilersoqatigiit Rolling Stonesikkut Rod Stewartilu Copacabanami siornatigut aamma tusarnaartitsinikuupput inuit 1 millioninit amerlanerusut taakkunani tusarnaariarlutik, politiillu 3000-nit amerlanerusut sulisinneqarlutik.

Madonnap siorna juunimi napparsimaleriasaarnermi kingorna tusarnaartitsisarnini nangippai, Rio de Janeiromilu tusarnaartitsisinnaalerluni.

Madonnap nuusiani siulleq "Like A Virgin" 1984-imi saqqummersikkamiulli, nutaamik ukiumut allortarlugilluunniit ukiulluunniit pingasut iluani saqqummersitsisarsimavoq. Nipilersortartut akornanni tusaaamaneqarnerit sunniuteqartorujussuusimasut ilaattut maanna isigineqarpoq..

Madonnap Rio de Janeiromi tusarnaartitsinissaanut atatillugu Rio de Janeiromi oqartussat nalunaarutigaat 4 millionit dollarit missaannik aningaasartuutaasimasut, tassa 27 millionit koruunit missaat. Aningaasartuutit sinneri namminersortunit aningaasaliisoqarneratigut akilerneqarput.

Madonnalli illoqarfissuarmi tassani tusarnaartitsinerata Rio de Janeiromut 400 millionit koruuninik isertitsissutaasinnaasimanera oqartussat nalunaarutigaat.