Nuummeersut assammik arsarnermi ajugaasut
Nunatsinni assammik arsarnermi ippassaq pissartanngortoqarpoq.
Imaluunnit eqqornerusumik oqaatigalugu: Pissartanngortut nutaavallaanngillat. Nuummeersummi GSS arnat angutillu unamminerinni pissartanngorput.
GSS Nuummeersullu nunatsinni assammik arsarnermi pissartanngorniunnermi 14-issaanik ajugaallutik.
Illoqarfiit pingaarnersaata timersortarfiani Inussivimmi pissartanngorniuttoqarpoq.
Arnat pissartanngorniunneranni finalimi Nuummeersut tassa GSS NÛK-lu unammipput. NÛK-mit arnat unamminermi siullermit unikkallarnissap tungaanut 10-11-mik siuaaqapput.
Unamminerulli aappaata aallartinnerani GSS siarpoq, GSS-ilu 26-21-mik ajugaalluni.
Angutit unamminerat arnat unammineratulli pissanganartiginngilaq.
Angutini Ilulissaneersut N-48-p aamma Nuummeersut GSS unammivaat.
Unamminerullu immikkoortuani siullermi GSS 21-9-mik siuangaatsiaqqavoq.
Angutit GSS-imeersut 36-18-imik ajugaanerminni kuultimik ujamilerput.