Najaaraq Møller: Sooruna inuusuttavut misilitsinnermi oqaatsitsinnik atuisinnaatitaanngitsut?

Misilitsinnermut nalunaarutitaaq ilinniaqqittut oqaluttariarsorlutik misilitsinnerminni oqaatsitigut ikorfartorteqarsinnaanissaannik qularnaarisuusoq ilinniarnertuunngorniarfinni aamma atuutilertariaqartoq, Inatsisartuni ilaasortaq Najaaraq Møller isumaqarpoq.

Allattoq Ann-Sophie Greve Møller

apriilip 15-at 2024 14:32

Nutserisoq Hanne Petersen

Meerartavut inuusuttavullu tamarmik misilitsinnissami oqaatsitta atornissaannik misilitsinnermiluunniit oqalutseqarnissamik periarfissaqartariaqarput. Misilitsinnermut nalunaarutitaaq ilinniarnertuunngorniarfinni aamma atuutilertariaqarneraasoq, Najaaraq Møller Siumumeersoq taama isumaqarpoq.

Nunatsinnimi ilinniaqqittut qallunaatut oqaluttariarsorlutik misilitsinnerminni oqaatsitigut ikorfartorteqarnissamik aggustip aallaqqaataani piumasaqarsinnaatitaalissasut, misilitsinnermut nalunaarutitaami allaqqavoq.

Aamma atuarukMisilitsinnermut malittarisassartaat ilinniartunut toqqissineruutaasinnaasut

Tassa iliniaqqittoq misilitsinnermini ilinniartitsisumik ilinniartitsissutaasumilluunniit ilisimasalimmik marluinnik oqaasilimmik oqaatsitigut ikorfartorteqarsinnaavoq.

Ilinniarnertuunngorniat misilitsinnerminni oqaatsitigut ikorfartorteqarnissamik aamma periarfissaqartariaqartut, Najaaraq Møller isumaqarpoq.

- Sualuppoq oqaatsinik pikkorlukkaanni taava soorunami amerlasuutigut immaqa kutalluta imaluunniit arlaatigut puigugaqartoorluta taamaalilluta karakterigut appasinnerulertarlutik, Inatsisartuni ilaasortaq Siumumeersoq Najaaraq Møller oqarpoq.

Qarasarissuugaluit karakterii appasittartut

Nunatsinni ilinniarnertuunngorniat ilinniartitsissutaasuni oqaatsit atorneqartut atorlugit misilitsittarput soraarummeertarlutillu.

Oqaatsillu ilinniartitsissutigineqakkajuttut tassaapput qallunaat oqaasii, ilinniarnertuunngorniarfinnimi ilinniartitsisut amerlanerpaartaat qallunaajupput.

Taamaammat inuusuttut qallunaatut oqallorinngikkaangamik anguniakkatik imminiiginnartariaqartaraat, Najaaraq Møller isumaqarpoq.

- Meeqqat, inuusuttuaqqat inersimasullu ilinniarnerup silarsuaani aamma assigiimmik periarfissinneqarnissaat angorusuppara, taanna oqarpoq.

NUNATSINNI ILINNIARNERTUUNNGORNIARFINNI MISILITSINNEQ

Ilinniarnertuunngorniarfiit ilinniarnertuunngorniarluni ilinniakkami naliliisarneq aamma uppernarsaasiisarneq pillugit Namminersorlutik Oqartussat nalunaarutaannik 2022-imeersumik malinnittussaatitaapput.
Ilinniartitsissutaasumi oqaatsit atorneqartut atorlugit misilitsittoqartarpoq, ilikkagassanut pilersaarummi allatut allasimasoqanngippat.
Censori oqaatsinik atuartitsissutaasimasunik naammaginartumik atuisinnaanngippat, misilitsinneq illersorneqarsinnaasumik qaffasissuseqartinneqarsinnaavoq oqaatsit censorimit atorneqartut aamma oqaatsit ilinniartitsissutaasut akuleriissillugit atorneqarnerisigut.
Oqaatsit assigiit censorimit misilitsittumiillu atorneqarsinnaappata, oqaatsit taakku ilinniartitsinermi oqaatsit atorneqartunut akulerullugit atorneqarsinnaapput.
Ilinniartitsissutini oqaasileriffiusuni misilitsinneq kalaallit aamma danskit oqaasii akuleriissillugit atorlugit ingerlanneqarsinnaavoq.

Najoqqutaq: Ilinniarnertuunngorniarluni ilinniakkami naliliisarneq aamma uppernarsaasiisarneq pillugit Namminersorlutik Oqartussat nalunaarutaat.

Allisiguk

Nunatsinnilu atuartut ilinniarnertuunngorniallu misilitsinnerminni kalaallisut oqaasilimmik oqaatsitigut ikorfartorteqarnissamik qinnuteqarnissamut aamma periarfissaqartinneqalernissaat Inatsisartuni oqaluuserisassatut siunnersuutigisareerini, Najaaraq Møller oqarpoq. Siunnersuutaali taanna itigartitsissutigineqarpoq.

Taamaammat Inatsisartuni oqaluuserisassatut siunnersuutigeqqinniarpaa.

- Uani uggorineranut peqqutaavoq, nalunnginnakku qarasarissorpassuugaluit qallunaatut pikkorlunnertik pissutigiinnarlugu amerlasuutigut karakterii appasitsinneqartartut, taanna oqarpoq.