Millioninut kuponimi Maniitsumi Brugsenimi pisiarineqartoq
Danske Spilikkut eqquiniaasartoq Maniitsumeersoq eqquivoq.
Pineqartup Danske Spilimit kuponi Maniitsumi Brugsenimi tallimanngormat pisiaraa – kuponilu taanna 1.399.626 koruuninik naleqarpoq.
Brugseni KNR-imut paasissutissiivoq.
Pineqartorlu sapaatip akunnerata siuliani millionærinngortuni kisimiinngilaq. Iluatsitsisummi marluk Eurojackpotimi eqqugassaq pingaarneq eqqoriarpaat, taakkuli taanna eqqornagu eqqugassat pingajuat eqqorpaat, Danske Spil tusagassiuutinut nalunaarummi allappoq.
”Marlunngornermi Århusip pigisaani iluatsitsilluni eqquisoqarpoq, taassuma eqqugassat pingajuat 1.562.951 koruuni eqqorpaa, Danske Spilillu pisisartuat Kalaallit Nunaanneersoq tallimanngornermi iluanaarluni. Taanna Brugsenimi kuponimik 1.399.626 koruunik naleqartumik pisisimavoq”, Danske Spil allappoq.
Eurojackpotimi sapaatip akunnerata tulliani eqqugassaq 621 millionit koruuniuvoq.
Danske Spilip oqarnera naapertorlugu Eurojackpotimi eqquiniaanermi eqqugassat annerpaasarput. Tassungalu marlunngornerit tallimanngornerillu tamaasa makitsisoqartarluni, eqqugassaq minnerpaamik 63 millionit koruuniusarpoq annerpaamillu 750 millionit koruuniusarluni.
