Misigisaq immikkut ittoq: Aqqartartumik Nuummut piffissami nutaanerusumi aatsaat tikeraartoqartoq

Nuummi umiarsualivimmi pingasunngornermi aqqartartoqaleriasaarpoq, amerlasuullu tamanna tupigusuutigaat, nunatsinnimi aqqartartoqartarnera qaqutigoorluinnarpoq.

Qaqutiguungaarmat Issittumi Sakkutooqarfimmi kommandørkaptajnip tikittoqarnikuusimanersoq nalunarnissutigaa.

- Nuummi Kalaallit Nunaanniluunniit piffissami nutaanerusumi aqqartartoqarnikuusimanersoq arlaannit eqqaamaneqanngilaq, taanna oqarpoq.

Aqqartartorli akeqqersimaarnermik siunertaqanngilaq. Aqqartartoq portugalimiut pigaat, pilersaarutaasumillu tikippoq, aqqartartormi ulluni makkunani nunatta kitaata sineriaani sungiusartussaavoq.

- Portugaliut aqqartartuat Kalaallit Nunaannukarnissamik sungiusariartornissamillu kissaateqarsimavoq. Sumiiffik issittoq sikunillu naapitsiffiusussaq. Taakku sumiiffimminni tamanna nalaanneq ajorpaat, taamaammat angalallutik ujartortariaqarpaat, Brian Jensen oqarpoq.

Aqqartartoq sapaatiummat Issittumi Sakkutooqarfimmit alapernaarsuummit ingiaqatigineqarluni sungiusaqatigineqartussaq aallaqqippoq.

Ejnar Mikkelsenimut sungiusarfissatsialak

Portugalimiut tikeraarnertik kisimik iluaqutissarsiffigissanngilaat. Aqqartartumik nunatta imartaaniittoqartarnera qaqutigoorluinnartuummat tamanna Ejnar Mikkelsenimi inuttat aqqartartumik sungiusarfeqarnissaannut sungiusarfissatsialaaavoq.

Sungiusaatissallu assigiinngitsut amerlapput.

- Aqqartartoq immap qaanukaraangami qanoq isikkoqartarpa? Aamma aqqartartumik attaveqaqateqarneq sungiusarneqarsinnaasoq, Brian Jensen oqarpoq, nangillunilu:

- Aqqartartorlu allatulli umiarsuaavoq immikkut illuinnartuusoq. Taamaammat imaani ajutoortoqarnerani ikuallattoqarnerani imaluunniit ajoqusertoqarnerani sungiusarneqarpoq.

Brian Jensenip aqqartartoq qaqutigorluinnartoq takuneqartartuummat soqutiginnilluartoqarnera paasisinnaavaa. Assi © : KNR / Johasinnguaq Olsen

Umiarsuit marluk imminnut qanoq sungiusaqatigiinnissaat qularnarpoq. Issittumi Sakkutooqarfiummi tamanna Ejnar Mikkelsenimi portugalimiullu aqqartartuanni inuttanut tamanna aalajangigassanngortippaat.

- Aamma imaassinnaavoq aqqartartumi inuttat Ejnar Mikkelsenimut angalaqataasinnaasut muminganillu.

Aqqartartup iluanit alakkarneqarnissaa tallimanngormat periarfissaavoq, Nuummilu inuppassuit immikkut illuinnartumik takusaqariartorput.