Danmarkimi ilinniartut peqatigiiffiat aningaasaliiffigineqaqqittalissasoq

Namminersorlutik Oqartussat kalaallit Danmarkimi ilinniartut peqatigiiffiannut Avalammut ukiuni arfinilinni aningaasaliiumanngereerlutik aningaasaliisinnaaleqqipput. Peqatigiiffik ukioq mannamit ukiumut 400.000 koruuninik aningaasaliiffigineqarsinnaalissaaq.

Tamannalu peqatigiiffimmut misigissutsinik sakkortuunik misigititsivoq.

- Oqiliallattorujussuuvugut, ilanngui qissasilaarlutik, pissutigalugu nalunnginnatsigu qanoq pisariaqartitsiginerigut uku aningaasaliissutit, siulittaasup tullersortaa, Aviaaja Lennert Olsen oqarpoq.

Peqatigiiffik naalakkersuisunit 423.000 koruuninik tapiissuteqarfigineqartalissaaq.

Peqatigiiffiup aningaasartuutaanut uppernarsaatit naammannginnerat pissutigalugu aningaasaliissuteqartarneq 2018-imili unitsinneqarnikuuvoq. Peqatigiiffik taamaalilluni ukiuni arfinilinni naalakkersuisunit aningaasaliiffigineqarsimanngilaq, immikkoortortaqarfimminiillu sisamanit marluk matusariaqarsimallugit, Lennert Olsen oqarpoq.

-Avalak Aalborg Avalak Odenselu aallartisaqqinniarneqarpata, soorunami ikiorsiissutinik tunillugit, taavalu ikiorlugit aallarteqqinniaalutseqqissavagut, Aviaaja Lennert Olsen oqarpoq.

Naapisimaarneq

Peqatigiiffiup kalaallit Danmarkimi ilinniartut katersuunnissaat ikiornissaallu siunertaraa. Ilaatigut ilinniartut ilinniarnermi nalaani kiserliorpata imaluunniit angerlarserpata. Taamaammallu aningaasaliissutit pingaaruteqarujussuusut, siulittaasup tulliata oqaatigaa.

Danmarkimi kulturi allaanerusoq kalaallit ilinniagaqartut ilinnialeraangamik avatangiiserilertarmassuk Naalakkersuisut aningaasaleeqqittalernerisigut ilinniagaqartut arlaannik aaqqissuussillutik naapisimaaqqissinnaanngussammata Aviaaja Lennert Olsenip nuannaarutigaa.

Kalaallit Danmarkimi ilinniagaqartut maanna 700-t missaannik amerlassuseqartut Aviaaja Lennert Olsen oqarpoq, taakkunannga 60-it missaat Avalammut ilaasortaanerarpai.

Allamit tapiiffigineqarneq

Nunatsinni politikerinit 400.000 koruunit missaannik aningaasaliiffigineqarnerup saniatigut Avalak danskit naalagaaffiannit ukiunut sisamanut 2 millionit koruuninik aningaasaliiffigineqarpoq. Tassa naalakkersuisunit aningaasaliinerup saniatigut 500.000 koruuninik 2028-p tungaanut ukiumut aamma aningaasaliiffigineqarluni.

Taamaammat peqatigiiffimmik ingerlatsineq maanna qulakkeerneqartoq, Aviaaja Lennert Olsen oqarpoq.

- Oqaatigilluarsinnaavarput tassa Avalak nukittusorujussuuvoq.