USA-mi Senatip Trumpip sorsunnissamut pissaaneqarnera killilerumanngikkaa

Amerikamiut Senatianni Republikanerit siunnersuutaat, Iranimut akeqqersimaartumik iliuuseqannginnermi Kongressimit akuersissuteqaqqaartarnissamik piumasaqaateqalersitsisoq, pingasunngornermi taasigamik itigartippaat.

Nutaarsiassaqartitsivik Reuters taama allappoq.

Siunnersuut Senatimi, Kongressip immikkoortortaqarfiisa marluusut aappaanni, 47-nit akuerineqarpoq 53-inillu akerlerineqarluni.

Inatsisartut parteerisaminni isumaqatigiissutaasut malillugit taasipput, Republikanererlu ataasiinnaq siunnersuutip ingerlateqqinneqarnissaanut taasivoq.

Aammattaaq Demokraateq ataaseq akerliulluni taasivoq.

Siunnersuut taanna sorsunnermi pissaaneqarnermut aalajangersakkamik taagorneqarpoq.  Præsident Donald Trumpip nunanut allanut sakkutuunik aallartitsisinnaaneranik killilersuiniarneruvoq kingulleq. 

Amerlanerussuteqaqqatartut

Politikerit siunnersuuteqarsimasut USA-p tunngaviusumik inatsisaani allassimasutut Kongressip sorsugiaqqusisinnaanera pilerseqqinneqassasoq siunnersuutigaat.

Siunnersuummut akerliusut tamanna tunngavilersuutaasinnaannginnerarpaat. Taarsiullugu Trumpip iliuusaasa inatsisinut naapertuunnerat USA-milu naalagaanertap killilimmik saassussisinnaatitaanera attatiinnarpaat.

Siunnersuummillu tapersersuisut Amerikamiut sakkutuuinik navianartorsiortitsisutut pisuutitsipput.

- Sorsunnerput soraajuitsuunngilaq, soraajuitsooqqajanngilarluunniit. Sorsukkunnaartoqapallassaaq, republikanerit sinnerlugit senatori Jim Risch naalagaaffiup immikkoortuanit Idahomeersoq siunnersuutip akerlerinerani oqalugiarnermini oqarpoq.

Taanna USA-mi Senatimi nunanut allanut tunngasunut ataatsimiititaliami siulittaasuuvoq.

Reuters naapertorlugu siunnersuutip Senatimi akuerineqarnissaa naatsorsuutaasimanngilaq. Trumpip Senatimi præsidentillu sinniisoqarfiani, Kongressip immikkoortortaasa aappaanni, republikanereqatai amerlanerussuteqaqqatarput.

Trumpittaaq sorsussinnaaneranik killiliinissamik siunnersuut siornatigut akuersaanngilaat.

Amerikamiut sisamaagaangata ataasiinnaasup USA-p Iranimut saassussinera tapersersoraa, misissueqqissaartarfimmit Ipsosimit Reutersimut misissuinerup marlunngornermi saqqummiunneqartup takutippaa. Affaasalu missaat Trump sakkutuunik atuinissamut piareersimavallaartoq isumaqarput.

// Ritzau