Uranitalinnik nunatsinni atuinissaq akuersaariartulerpaat

Greenland Minerals and Energy aatsitassanik qaqutigoortunik Kuannersuarni qalluinissamut akuerineqassappat qallorneqartussat pinngitsooratik uranitaqartussaapput. Tamanna aatsitassarsiorniartunut aporfiusinnaavoq nunatsinni uranimik qalluinissaq akuersaarneqanngimmat. Uranimut naaggaarluinnarsimaneq kingusinnerpaamik inatsisartuni oqaluuserineqartussaavoq uranitalinnillu qalluinissaq akuersaarneqassappat Danmarkimiit tapersiisussat aamma piareersimanerarput.

- Kalaallit uranimut naaggaarluinnarsimaneq allanngortissappassuk isumaqarpunga Danmarkimiit tamanna tapersertariaqaripput, Radikalet nunanut allanut tunngassunut oqaaseqartartuat Rasmus Helveg Petersen Berlingske Tidendemut oqarpoq.

Dansk Folkeparti aamma akuersaalersaarpoq uranimut naaggaarluinnarneq nunatsinniit allanngortinneqassappat. Nunanut allanut tunngasuni nunatsinnullu tunngasuni oqaaseqartartoq Søren Espersen akornutissaqartitsinngilaq Naalagaaffeqatigiiffiup avannarlersaani uranitalinnik qalluisoqassappat.

- Uranitalinnik aningaasarsiortoqassappat tamannalu illersorneqarsinnaasumik pisinnaappat soorunami taamaasiortoqartariaqarpoq. Dansk Folkepartipt tamanna aporfissaqartinngilaa, Folketingip siulittaasoqarfia Kuannersuarnut takuniaareersoq Espersen oqarpoq.

Aamma Folketingimi illuatungerpiaaniit nunatsinni aatsitassat qanoq pineqarnissaat kalaallit oqartussaaffigigaat naqissuserneqarpoq. Taamaattoq avatangiisinut tunngasut eqqarsarnartoqartinneqarput.

- Neriuppunga paasineqarsinnaassasoq sillimaniarneq aamma avatangiisit eqqarsaatigalugit tamanna isumatusaarnerunngitsoq. Kisianni tulluartuusorinngilara arlaannik iliuuseqarnissamik siorasaaraluni tamatuma oqaluuserinissaa. Nunap pisuussutaanut oqartussaaneq kalaallinut tunniutereerparput taannalu namminneq aqussavaat. Matumanili ajornartorsiuteqartoqassappat oqaloqatigiinnikkut tamanna qaangerneqartariaqarpoq, Enhedslistenimiit Finn Sørensen oqarpoq.

Danmarkimi naalakkersuisuni partiit anginersaat Socialdemokratit ingerlaannaq Kuannersuarni uranitalimmik qalluinissaq akuersaanngilaat.

- Nunap pisuussutaanut akisussaaneq kalaallit pigigaluaraat taamaattoq isumaqarpunga uranitalimmik qalluiniarneq ajornartorsiutitaqartoq. Tamatuma kinguneranik Kalaallit Nunaata siunissaa ernumanartulimmik immeraassutaalersinnaavoq. Taamaattumik neriuppunga Namminersorlutik Oqartussat tusaaniarumaaraatigut avatangiisit pillugit ernumanartoqartitsilluta nalunaarutta. Nunanut allanut tunngatillugu Danmark Kalaallit Nunaat sinnerlugu akisussaaffeqarpoq. Uagullu qularnaatsumik paaserusupparput uran Kalaallit Nunaanni qaqinneqartoq nunanut sorlernut tuniniarneqassanersoq, Socialdemokratit nunanut allanut tunngasuni oqaaseqartartuat Jeppe Kofod Berlingske Tidendemut oqarpoq.