Tusarniaanerup ingerlanneqarnera sakkortuumik isornartorsiorneqarpoq
Naalakkersuisut suliniutit angisuut pillugit inatsimmut allannguutissatut siunnersuutaata tusarniaassutigineqarnerani TGI-mit tusarniaanermut akissuteqartoqarnissaa naatsorsuutigineqassanngilaq. Suliniutit angisuut pillugit inatsisip atuuttup tusarniaassutigineqarneranut atatillugu ilaatigut tusarniaanerup ingerlanneqarnerata isornartorsiorneqarneranik imaqartumik TIG-ip tungaanit takkajaamik akissuteqartoqarpoq.
-Innuttaasunik peqataatitsinerunikkut tusarniaasarnikkullu innuttaasut suli annerusumik peqataatinneqarnissaannik Naalakkersuisunngortut qineqqusaaruteqarput, kingornalu aamma oqaatigeqqissimallugu. Suliniutit angisuut pillugit inatsisip allanngortinneqarnerata matumani pisup takutippaa, inatsisiliornikkut sulinerup tungaatigut pitsanngoriaateqarsimanngitsoq. Killormummi pisoqarpoq, Transparency International Greenlandip siulittaasua eqqartuussissulerisoq Anders Meilvang nassuiaavoq.
TGI isumaqarpoq tusarniaanermut akissuteqarnikkut inatsisiliornikkut ajorseriaataasinnaasut akuerineqassasut, TGI-lu taamaaliorusunngilluinnarpoq. Taarsiullugu innuttaasunik peqataatitsinerunissamut suliniutissat piareersimasuutigineqarput, TGI-llu tungaanit tamanna naammaginartinneqanngilluinnarpoq.
TGI, ICC, WWF aamma GA sapaatit akunnera kingulleq innuttaasunik akuutitsinerunissaq pillugu isumasioqatigiipput. TGI isumaqarpoq Kalaallit Nunaanni innuttaasut inatsisiliortut suliaannik paasinnilluarsinnaassappata suliutit taamaattut pisariaqartinneqartut.