Trumpip ivertinneqarnermini nunarput eqqaanngikkaa

USA-mi præsidentitut ivertinneqaqqammerluinnartup, Donald Trumpip nunarput ivertinneqarnermini oqalugiarami ataasinnguamilluunniit eqqaanngilaa.
Taassuma 2019-imi siullermik præsidentiunermi nunatsinnik pisiniarluni oqaatigisamisulli nunarput aqulerniarlugu sakkutuulersornikkut pinngitsaaliiniarnissani itigartinniarnagu sapaatit akunnerisa marluk matuma siorna oqaatigigaluarpaa.
Taassumali ”Panamap ikerasaliaa uterteqqinniarlugu” aamma Den Mexicanske Golfilu Den Amerikanske Golfimik ateqalersinniarlugu oqaatigalugit.
Uuliasiorniartoq
Trumpip oqalugiarnera akunnerup affaata missaanik sivisussuseqarpoq, tamannalu Washingtonimi kongressip illorsuani pivoq. Trump USA-mi præsidentit 47-ssaattut nunatta nalunaaqutaa malillugu pingasunut ivertinneqarpoq.
- Sillimaniarnerput pilersinneqaqqissaaq, Trump nunatsinnut attuumassuserneqarsinnaasumik oqalugiarnermini oqarpoq.
Taassumalu uuliamik gassimillu piiaanerup sukkatsisinnissaa oqaluugeringaatsiarpaa, tamannalu præsidentiusimasup, Joe Bidenip silap pissusianut politikkimit ukkatarisaanit allaanerulluinnarluni.
USA gassimik uuliamillu annerpaamik peqalerusuttoq nukissiuutillu taakku marluk atorluarniarlugit Trumpip oqaatigaa.
- Drill, baby, drill, katerittut nuannatingaatsiartut oqarfigai.
Nunalu tamarmi nukissiuuteqarnikkut ajornartooqqasoq nalunaarutigaa.
- USA piffissami matumani pitsaasumiippoq.
- Trumpip aqutsinerani USA ullut tamaasa siulliuttarniarpara, Trump oqarpoq.
Nutaarsiassaqartitsivik Reuters naapertorlugu præsidentitut ivertinneqaqqammersup 2015-imi iliuuserisamitulli USA Parisimi isumaqatigiissummit anisinniarpaa.
Tamanna Det Hvide Husimit allakkami ullumi tamanut saqqummiunneqartumi allassimavoq.
Naalagaaffeqatigiinnerup oqallisigineqarnera
Naalaffeqatigiinneq sapaatini akunnerni marlunni kingullerni oqaluuserineqarnermisulli oqaluuserineqartiginikuunngilaq. Naalakkersuisut siulittaasuata, Múte B. Egedep (IA) nunarput tuniniagaanngitsoq arlaleriarluni oqaatigaa. Arlaleriarlunilu nunarput kalaallit pigigaa, kalaallillu danskiorusunngitsoq imaluunniit amerikamioorusunngitsut - soorunamilu - kalaaliorusuttut oqaatigalugu.
Pisut kingunerisaanik ministeriunerup Mette Frederiksenip Donald Trump sapaatip akunnerata siuliani minutsini 45-ni oqarasuaatikkut oqaloqatigaa. Oqaloqatigiinnerat Trumpip nunatsinnik aqutsilernissamut angusaqarusunneranut ilaatigut tunngassuteqarpoq.
Múte B. Egede sapaatip akunnerata siuliani Fox Newsimiippoq, taassumalu nunarput kalaallit pigigaat oqariartuutigeqqippaa.