Trumpip atorfinitsinneqarneraniit USA-mi pisortaqarfinni 50.000-it atorfinitsinneqartut

Donald Trump januaarimi præsidentitut ivertinneqarmalli Amerikami naalakkersuisut sulisunik 50.000-inik atorfinitsitsipput.

Naalagaaffeqatigiinni sulisoqarnermut pisortaq, Scott Kupor taama ilisimatitsivoq.

USA-mi nunasiniartunut pisortaqarfimmi ICE-mi annerusumik atorfinitsitsisoqartoq, paasissutissiissutigineqarpoq.

Trumpip naalakkersuisunik allanngortitserusunneranut atatillugu suliniuteqarnermini, naalagaaffeqatigiit naalakkersuisuini atorfiit allat ikilisinneqartorujussuupput.

USA-mi akileraartarnermut oqartussaqarfimmi, IRS-imi, peqqinnissaqarfimmilu ilaatigut soraarsitsiortortoqarpoq atorfinitsitsisarnerlu unitsinneqarluni.

Sulisut 300.000-it soraarsinneqarnissaat allaffeqarfimmiit naatsorsuutigineqartoq, Scott Kuporip aggustimi oqaatigaa. 

Trumpip milliardæri Elon Musk naalagaaffiup sulisuinik, taamani 2,4 millioniusunik, ikilisaasussatut januaarimi atorfinitsippaa. Naalagaaffeqatigiit ataanni sulisut amerlavallaarlutillu sunniuteqarpallaarunnaarsimanerat Muskip oqaatigaa - tamannalu Trumpip isumaqataaffigaa.

Taamaasilluni Musk  atorfimminit maajimi soraarnissami tungaanut, naalakkersuisut sunniuteqarluartumik ingerlatsinissaannut naalakkersuisoqarfianni (Doge) pisortanngorpoq.

Tapersersortissarsiorneq assuarineqartoq

Inuit pisinnaatitaaffiinik inatsisinik atuutsitsinermut, akileraarutitigut isertitassanik katersuinermut mingutsitsinngitsumillu nukissiornermik suliniutinik atuutsitsinissamut akisussaasut, Trumpip aqutsisuisa soraarsippai.

Sulisut ikilisinneqarnerinut atatillugu sulisut 154.000-it missaat akissarsiaqarlutik soraarsitaanissaminnut akuersipput.

ICE qaammatini kingullerni isornartorsiorneqarpoq, USA-milu sumi tamaani oqartussaasunut akerliussutsimik takutitsisoqarpoq. Tamatuma kingunerisaanik Trumpip sakkutuut paarsisut, nunap innuttaannik illersuisut, USA-mi illoqarfinni anginerusunut arlalinnut inissippai.

Amerikami katuullit biskoppiisa kattuffiat isornartorsiuisut ilagaat.

Kattuffik Trumpip nunasisunut akerlilersuineranut qaqutigoortumik sisamanngornermi assuarinnippoq. 

Biskoppit nunasisunut mamarliinertut taasartik oqallinnerlu aliasuutigigaat, nalunaarummi allaqqavoq. Inunnik amerlasuukkaanik aalajangersimasumik Amerikamit pinngitsaaliissummik aallartitsisarneq akerleraat.

/ritzau/Reuters