Svend Hardenberg isornartorsiorneqarusunngikkaluartoq

Hardenbergip soqutigisaanik tusagassiortut Berlingskemeersut marluk misissuinerisa kingorna, Svend Hardenberg oqarpoq, suliffeqarfimmini akisussaaffini tamaaasa asoorussimallugit.

Pisoq aallartippoq, Kinamiut aatsitassarsiorfiini aningaasaateqarfiinilu pisortat 17-it, Nunatsinnut sapaatip akunneri marlussuit qaangiuppata tikeraarnissaannut atatillugu, Berlingske Business allaaserisaqalermat.

Kinamiut tikeraarnissaanni aaqqissuisuupput, suliffeqarfik Greenland Invest. Taakku aaqqissuussaralugu, Nunatsinni aatsitassarsiornissanut uuliasiornissanullu pilersaarutit suunerinik paasitsitsiniaanerit.

Suliffeqarfik Greenland Invest, ullualunnguit matuma siorna tikillugu ingerlanneqarpoq pigineqarlunilu, Svend Hardenbergimit aamma Kommune Kujallermi borgmesterimit Jørgen Wæver Johansenimit, piginneqataasunullu ilaalluni entreprenøri, Rasmus Christian Rasmussen.

Svend Hardenbergip tallimanngormat oqaluttuaraa, suliffeqarfimmik piginneqataasoq, Jørgen Wæver Johansen peqatigalugu suliffeqarfitsit qimanniarlugu.

Berlingske Businessilli allaaserisaani assiliaq allarluinnaq oqaluttuarineqarluni.

Allaaserisami tassani oqaluttuarineqarpoq, Svend Hardenbergip suliffeqarfiutaata, Kinamiut tikeraarnissaannut attuumassuteqarnera arfininngornermi saqqummiunneqassasoq.

Svend Hardenbergillu aviisimut ilumoornerarpaa, Greenland Investimut piginneqataassuteqarnini. Taamannalu oqaatigereeraa, tusagassiortunit paasitinneqarpoq, Namminersorlutik Oqartussani pisortat qullersassaattut inissisimalernermini nammineq soqutigisai tamassumunnga attuumasuuteqarluartuusut isornartorsiorneqarsimammata.

Isornartorsiuisoq tassaavoq, Transparency Greenlandip siulittaasua, Anders Meilvang.

- Namminersorlutik Oqartussanit, aatsitassarsiornernut tunngasut sorliit aallartisarneqassanersut pilersaarusiorneqartarput aamma kikkut aatsitassarsiorsinnaanerannut akuersisuusarlutik, tassalu tamakku Svend Hardenbergip akuuffigiligassai, Namminersorlutik Oqartussani qullersatut sulilernermini, Anders Meilvang oqarpoq imalu nangilluni.

- Uanga isinnit isigalugu, Svend Hardenbergip soqutigiligassai marluupput imminnut attuumassuteqarluartut, Anders Meilvang oqarpoq.

Aviisip Berlingske Businessip isornartorsiut tamanna Svend Hardenbergimut apuuppaa. Svend Hardenbergilu nassuiaavoq, Jørgen Wæver Johansen peqatigalugu, Kinamiut tikeraarnissaat piffissami sivisuumi aaqqissuussimallugu aamma Namminesorlutik Oqartussani qullersatut atorfinittussanngornerminik paasitinneqareernermi kingorna.

- Greenland Investimi suliakka annikillisarpakka suliffeqarfimmilu tassani ulluinnarni akisussaaffik qimallugu. Suliffeqarfiup taassuma ulluinnarni ingerlatsisussaanik ujarlerpugut aamma siulersuisuunernik ingerlatsisussanik qinaasilluta, Greenland Invest-imulli piginneqataanera qimannianngilara, Svend Hardenberg oqarpoq.

Aviisip Berlingske Businessip allaaserisani tamanna saqqummiutsinnagu, imarisassai Svend Hardenbergimut nassiuppaat qanoq inneranik paasitikkumallugu. Svend Hardenbergillu allaaserisaq atuareerlugu, nassuiaanni allangortippaa oqarluni, Kinamiut tikeraarnissaannut atatillugu pilersaarusiornerit aallarnisarneqarnerat taamaallaat akisussaaffigisimallugu, tamannalu pisimasoq Qaasuitsup Kommuniani pisortaanertut atorfinitsinneqannginnermini pisimasoq oqaatigalugu.

Pisorli tassa tallimanngormat allarluinnartut isikkoqalerpoq, Svend Hardenberg aviisimit Sermitsiamit apersorneqarnermini oqarami, piginneqataaffimminut suliffeqarfimmut pituttorsimaniarunnaarami.