Siumut immikkut ittumik juunip naalernerani ataatsimeersuassaaq
Siumut Inatsisartunut qinersinerit siuliinit qinersisikinnerungaatsiarpoq, oqaluttuarisaanermi aatsaat taama qinersisikitsigaluni.
Siumut Inatsisartunut 2021-mi qinersinermi 7.986-inik taaguunneqarpoq, qinersinermili kingullermi 4.210-nik taaguunneqarluni. Siumup siulittaasorisimasaa Erik Jensen 2021-mi qinernermi 1.186-inik taaguunneqarpoq, ukioq manna affaannangajannik 645-riarluni taanneqarluni.
Erik Jensen qinersinermik angusarlunneq peqqutigalugu siulittaasutut tunuarpoq, Vivian Motzfeldtilu siulittaasuugallartussatut toqqarneqarluni.
- Eriup kissaatigaa Siumup siulersorneqarneranit tamakkiisumik anissalluni. Taamatullu oqarneq isumaqanngilaq Siumuminngaanniit anisoq. Suliassani qinikkatut Siumut tamakkiisumik tapersersorlugu sulinissaminik inissikkusunneruvoq siulersuisuunernut ilaanerminngaanniit.
Partiip malittarisassaani allassimasut naapertorlugit siulittaasoq qinigaaffiup ingerlanerani tunuassagaluarpat siulittaasup tullia siulittaasunngorallassaaq. Taamaattumik Vivian Motzfeldt, siulittaaasup tulliatut inissisimasimasoq, maanna siulittaasuugallarpoq.
Qinigassanngortittoq
Siumut immikkut ittumik aasaq manna ataatsimeersuartussanngorpoq, tamannalu qaammatip naalernerani juunip 28-ani Nuummi pissaaq. Ataatsimeersuarnermi Siumumi siulittaasunngorniunnissaq qulequttani pingaarnerpaatut inissisimassaaq.
Siumut allattoqarfiat KNR-imut taama ilisimatitsivoq.
Vivian Motzfeldt partiimut siulittaasutut tamakkiisumik atuutilerusuppoq. Taamaattumik immikkut ittumik ataatsimeersuarnermi siulittaasussatut sassarniarpoq.
Vivian Motzfeldt KNR-imut Inatsisartunut ukioq manna qinersereernermi taama ilisimatitsivoq.
Erik Jensen taama iliornerata kingorna siulersuisuunernut nutaamik ilaasortanngortoqanngilaq. Aasap tungaanut maanna issiasut aqutsisuussapput.
