Qeqqata 45 millioninik sinneqartoortoq - Borgmesterili illuatungaanut saattoqarsinnaaneranut ilimasaarivoq
Qeqqata Kommuniata 2024-mi naatsorsuutit saqqummiuteqqammerpai. Inernerit takutinneqartut borgmesterimit nuannaarutigineqarput.
Qeqqata kommunia 2024-mi 45 million koruuninik sinneqartooruteqarpoq.
-Sinneqartooruteqarnerput soorunami iluarisimaarpara. Tamatumunngalu sulisinnaasut amerlanerpaat sulinerannik pissuteqarpoq, taamaattumik innuttaasut suliffeqarfiillu sulilluarsimanerannut qutsavigaakka, Borgmesteri Malik Berthelsen tusagassiutinut nalunaarummi oqarpoq.
Kommunip aningaasaataani sinneqartoortoqaraluartoq, Malik Berthelsenip annertuallaamik qiimmatsannissaq mianersuuteqquaa.
- Sinneqartooruteqaraluarlutali suli aningaasaqarnikkut sukannersumik ingerlatsinissarput pisariaqarpoq.
Suli unammilligassaqartoqarpoq
Missingersuutaasunit 42 million koruuninik akileraartoqarnerusimanera tamatumunnga pissutaasoq, kommunip pisortaanit Hans Christian Svärdimit borgmesterimiillu ukkatarineqartoq tusagassiutinut nalunaarummi oqaatigineqarpoq.
Isertitat 2023-mut sanilliullugit 63 million koruuninik qaffariateqarsimapput.
Sanaartornermi suliassat amerlinerat suliffeqarfiillu akileraartarnerat isertitaqarnerunermut peqqutaapput.
Kangerlussuarmi sulisorpassuit ukioq kingulleq allamut nuunneqarsimapput. Nuummi mittarfissuartaartoqarnera tamatumunnga pissutaavoq.
Sisimiuni sanaartornerit annertuut naammassititilerput, tamannalu kommunimut isertitakinnerulernissamik kinguneqassaaq, Malik Berthelsen naqissusiivoq.
Taamaattumik ukioq manna isertitaqarnerup annertussusaa ukiup tulliani aamma atuutissasoq naatsorsuutigineqarsinnaanngilaq.
- Aalisarnermiit isertitat nalorninartumiipput, taamaattumik akileraarutitigut isertitat kisiisa naatsorsuutigisinnaanngilagut.
- Illuatungaanilu inunnik isumaginninnerup iluani aningaasartuutit qaffakkiartornerat aammalu kommunip illuutai suliffeqarfiutaallu ukiuni tulliuttuni aserfallatsaalineqarnissamik pisariaqartitsisut, annertuunik aningaasartuuteqarfiunissaat sillimaffigisariaqarpagut, borgmesteri Malik Berthelsen, naggasiivoq.
Missigersuutit equngasut
Aningaasarsiornikkut aamma sukannersumik aqutsisoqarpoq.
Kommunip 207 millionit koruuninik amigartooruteqarnissani missingersuutigaa – taamaattumik sinneqartoorneq milliardit sisamararterutaannik nikingassuteqarpoq.
Kommunemi pisortaq Hans Christian Svärdi naapertorlugu, Qeqqata Kommunia sanaartornermi aningaasaateqarfeqannginneranik tamanna peqquteqarpoq.
Tassa imaappoq, sanaartukkalli naammassineqareernerata kingorna aatsaat aningaasat atorneqarsimasutut allaqqalertaraluartut, sanaartornernut tamanut aningaasartuutissat missingersuutinut nalunaarsorneqartarput.
