Qeqertarsuatsiaani atuarfik oquttoq suli matoqqasoq: Angajoqqaat atuarfimmilu aqutsisup tamanna isornartuusoraat
Qeqertarsuatsiaani atuarfik oqoqangaatsiarnera pissutigalugu matoqqavoq.
Maanna ukioq ataaseq qaangiuttoq atuarfimmi atuartut 18-it katersortarfimmi palasillu illuanik taaneqartartumi ullumikkut klubbitut atorneqartumi ullumikkut atuartinneqartarput.
Tamannalu angajoqqaat naammagisimaanngilaat.
- Killiffik uanga iluarinngeqaara assut angajoqqaatut atuartuuteqartutut, Unu Berthelsen angajullerni atuartuuteqartoq oqarpoq. Taassuma ernermi kajumissusaa pissutsinit sunnerneqaqqasoq oqaatigaa.
- Soorlu ernera masssakkut trinimi angajullermi atuartoq, atuarfimmut taqqamunga uterusuttaraluarpoq - klasserisani massakkut nuannarilersinnaannginnamiuk.
Ilinniartitsisup siunissaq isumaliutigigaa
Atuarfiup aqutsisuata Tuperna R. Didriksenip atuartut klassii arlallit atuartitsinermi ataatsimoortinneqartarnerarlugillu inissaaleqinerarpai.
- 1. 2. 3. klassit ataatsimoorlutik atuartinneqartarput, 4. aamma 5. klassit ataatsimoortinneqartut aamma 6. 7. aamma 8. klassit ataatsimoortinneqartartut taassuma oqaatigaa.
Atuartullu immikkut pisariaqartitsisut aamma ataatsimut atuartinneqartartut atuarfiup aqutsisuata oqaatigaa. Naallu katersortarfimmi inissaalatsisoqaraluartoq palasillu illutoqaa inissaqarpallaanngikkaluartut atuartut atuariartortartut atuarfiup aqutsisuata oqaatigaa.
- Atuartut inissaqarluartumik atuartussaagaluit inikilliorlutik atuarput naammagittarpugut kisianni aamma imaannaanngitsuuvoq taamatut atuartitsineq, Tuperna R. Didriksen oqarpoq.
Atuarfimmi ilinniartitsisunit tallimanit ataatsip atuartitsineq piffissami sivisunerusumi taamaaginnassappat siunissani isumaliutigalugu isertuutinngilaa.
- Soorunami nakeriallannarpoq suliffik nuannarisaq qimaannassanerlugu allaat eqqarsarnarsilluni naak suliffik nuannarigaluarlugu suleqatillu.
- Inissaaleqineq sumiiffissaaleqineq tamakku peqqutaallutik kalluaasorujussuunikuuvoq naammagittarneq naammagittartuarneq atorparput, Lippinnguaq Martinsen ilinniartitsisuusoq atuartumullu aamma angajoqqaajusoq oqarpoq.
Pissutsit nukillalaarnartut
Pissutsit ilisimasaqartoqannginneralu tamanut nukissaajaataasut, Tuperna R. Didriksenip erseqqissaatigaa.
- Paasiniaasaqattaarnerit qaqugu iluamik inissinneqassaagumik paasiniaajuaannarnerit aamma taakkua nukissamik immikkut atuiffiupput, taanna oqarpoq.
Naall init ilai matoorarneqaraluartut ilinniartitsisut suliatik pissutigalugit atuarfimmut iseqqittariaqartartut, atuarfimmi aqutsisup oqaatigaa.
- Tamaani isersimasarpunga allamik allaffissaqannginnama, Tuperna R. Didrikson oqarpoq.
Ernumaginngiliuk?
- Ernumanartippara ingammik naartulernikooriarama, taanna oqarpoq.
- Kisianni paasitinneqarpugut nutarsarneqassasoq kisianni nalugallarparput oqaatigisinnaanngikkallarparput qaqugorpiaq kisianni imatut oqaatigineqarpoq nutarsarneqariarluni maanga uteqqikkumaartugut, Tuperna R. Didriksen oqarpoq.
Qaqugu?
- Tassa taanna nalunartua, atuarfiup aqutsisua oqarpoq.
Ilanngutassiap Qanoruukkut saqqummiunneqareernerata kingorna atuarfiup nutarterneqarnera 2026-mi februaarimi aallartinneqarnissaa naatsorsuutigineqartoq, Kommuneqarfik Sermersooq KNR-imut allakkatigut akissuteqarnermi oqaatigaa. Nutarterinerli qaqugu naammassineqassangatinneraat eqqaanngilaat.
