Politikeri puussiat plastikit tunineqarnerat pillugu: Tupaallannaq

Siorna nunami maani puussiat plastikit 2,8 milliuunit tunineqarput. Politikeri IA-meersoq Pipaluk Lynge-Rasmussen isumaqarpoq amerlangaaramik quarsaarnartuusut.
Aningaasaqarnermut naalakkersuisoqarfik naappertorlugu siorna puussiat plastikit avatangiisinut akitssuuserneqarnerat landskarsimut 11,5 milliuunit koruunit missaannik isertitsiffiuvoq. Asseq: Kalaallit Nunaanni Brugseni Assi © : Kalaallit Nunaanni Brugseni
Allattoq Ane-Marie Petersen, Anders Dall
februaarip 09-at 2022 11:26
Nutserisoq Per Rosing

Siorna nunatsinni pisiniarfiit uiguleriiaat annerpaat Brugseni, KNI aamma Pisiffik puussianik plastikinik katillugit 2,8 milliuuninik tunisipput.  

Naalakkersuisunit Pipaluk Lynge Rasmussen-imut IA sinnerlugu qinigaasumut akissummi takuneqarsinnaavoq.

Nunatsinni puussiat plastikit tunineqarnerisa kisitsisitai pillugit apeqquteqaqqammerpoq.

Taamaaliorpoq ulluinnarni plastikip qanoq initutigineranik eqqarsaleqqulluta, aamma atuinerup qanoq annikillisinneqarnissaanut iliorsinnaanersugut.

AAMMA ATUARUK Plastikkit ataasiaannagassat pitsaasuunngillat: Naalakkersuisut inerteqquteqalerusupput

Siorna pisiniarfiit taakku pingasut puussianik plastikinik 2,8 milliuuninik tunisaqarsimanerat quarsaarutigaa.

- Puussianik plastikinik qanoq amerlatigisunik atuinerput tupaallannarpoq, eqqarsaatigigaanni nunatsinni inuit 56.000 -57.000-iinnaasugut. Kisianni allanik aamma eqqarsalersitsivoq qanoq annertutigisumik plastikimik atuisugut, puussiat plastikit ulluinnarni atortakkatta saniatigut, aamma iliuuserisartakkatsinnik ulluinnarni plastikimik atuinitsinnik annikinnerulersillugit allanngortitsisinnaanersugut, Pipaluk Lynge-Rasmussen oqarpoq.

Landskarsimut aningaasaqartitsivoq 

Puussianik plastikinik tunisineq landskarsip aningaasarsiutigaa.

Tassa puussiat plastikit avatangiisinut akitsuuteqarmata. Kingunerisaanik puussiap ataatsip tunisaanerani koruunit pingasut landskarsimut nakkartarput.

Aningaasaqarnermut naalakkersuisoqarfik naapertorlugu siorna puussianut akitsuutinit landskarsi isertitaqartoq 11,5 milliuunit koruunit missaannik.

AAMMA ATUARUK Arfeq qaqutigoortoq plastikkinik nerisaqarsimallunilu puaani parasitsiseqartoq

Pipaluk Lynge-Rasmussenimut puussiat tunisat qassiunerat kisimi tupaallaataanngilaq, kisianni aamma Naalakkersuisut qanoq annertutigisumik isertitaqarfigineraat.

- Naalakkersuisut puussiat plastikit aningaasarsiutigereerpatigit, taava nunatut plastikimik atuiunnaarnissaq ajornakusoorpoq, ingammik landskarsimut isertitsinissaq eqqarsaatigigaanni.  Tavalu eqqarsarpunga suut aningaasarsiutiginerlugit mianersuuttariaqarparput, avatangiisinut iluaqutaanngippata, Pipaluk Lynge Rasmussen oqarpoq.

Upernaakkut Inatsisartut ataatsimiinnissannut inatsisissamik siunnersuuteqarniarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk