Peqqissaasoq suliffimminit soraarpoq Narsallu ipisinneqarnissaa ernummatigaa
Berit Bygip Narsamut ukiut sisamat affarlu matuma siorna nuukkami utoqqalinersiaqalernissami tungaanut nunatsinniinnissani takorloorsimagaluarpaa.
Narsamili napparsimmavimmi peqqissaasutuaalluni soraarniuteqarpoq decembarimilu Danmarkimut angerlassaaq.
Sulinermini artukkerneqarneq aalajangernermigut tunngavigaa, oqarneratullu pissutsit taamaattut ’akisussaassuseqanngitsumik sulisitsinerupput’.
-Oqareernittulli maanga nuukkama taama eqqarsarsimanngikkaluarpunga. Tamanna arlalippassuartigut nuannarinngilluinnarpara, KNR-imut oqarpoq.
Allanngortoqarneranit Narsami peqqinnissaqarfiup ajorseriarnissaa taamaalisoqarneranilu illoqarfinni mikinerni peqqinnissaqarfiit sullissinerisa aamma ajorseriarnissaat ernumagaa.
Peqqinnissaqarfiup sullissinera ajorseriartoq
Berit Bygip oqarneratut nakorsaqarniarnikkut allanngortoqarnerani ukiup aappaata affaata matuma siorna ajornartorsiuteqalerpoq. Tassanngaanniit sulisunik soorlu peqqissaasunik, oqalutsinik portørinillu ikilisaasoqarpoq.
Sulisut allannguutit pillugit paasitinneqarnikippallaarsimanerarpai. Qanoq inissisimasoqarnersoq pillugu aperimmata, Qaqortumi peqqinnissaqarfimmi aqutsisunit ima akisimanerarpai:
- Sipaarniarnerit pissutaanerarpaat. Aningaasaqarniarneq pissutaasoq paasitinneqarput.
Berit Bygip oqarneratut kujataani peqqinnissaqarfimmi aqutsisut, kujataani peqqinnissaqarfimmut aningaasat immikkoortinneqarsimasut 4 millionit koruuninik siornarnit ikinnerusut paasissutissiissutigisimavaat.
KNR-ip peqqissutsimut naalakkersuisoq Anna Wangenheim aningaasat eqqortuunerat pillugu aperaa. Aningaasalli qanoq amerlatigineri taanngilai.
Berit Bygip peqqinnissaqarfiup ajorseriartuaarnissaa naggataatigullu napatinneqarsinnaajunnaarnissaa ernummatigaa.
- Narsap pingaaruteqassusaa annikillisinniarneqassappat kingunerisaanillu ima oqartoqartalissanersoq: Taamannak ingerlasoqarsinnaanngilaq sulisussameerput, tassani sulisoqarumanngilaq tamanna matusariaqarparput, ernummatigeqaara.
Tamannali siunertaanersoq qulakkeersinnaanngilaa. Peqqinnissaqarfiilli ikilisinneqarnissaat ernummatigaa.
- Peqqinnissaqarfiit aserorneqassappata inuit tassani kisinngoruttut inuuniarnermikkut nalorninartumiilissapput. Tamanna illoqarfinnut annernut nuttartitserusunnertut isigaara.
Naalakkersuisut sipaarniartitsinnginnerarput
KNR-ip peqqissutsimut naalakkersuisoq Anna Wangenheim Narsami sulisoqarniarnikkut nakorsaqarniarnikkullu allanngortoqarneranut tunngatillugu, allanngortoqarneranut suut tunngavigineqarnersut napparsimasunullu qanoq kinguneqarsinnaanersoq pillugu aperaa.
Wangenheimip Naalakkersuisut Narsami napparsimmavimmut tunngatillugu sipaarniarnernut ikilisaanernullu aalajangiisimannginnerarpai.
- Naalakkersuisut peqqinnissaqarfinni, uanilu Narsami napparsimmavimmi, sipaarniarnerit ikilisaanerillu pillugit aalajangiinikuunngillat.
Anna Wangenheimip Naalakkersuisut peqqinnissaqarfimmut missingersuutit ikilinissaannut aamma pilersaaruteqannginnerarpai. Akerlianilli 2025-mut 66 millionit koruuninik 2026-mullu 60 millionit koruuninik aningaasaliisoqarneruvoq. Wangenheimip oqarneratut aningaasat ikilisaanissanut innuttaasunullu atugassarititaasut ajorseriarnissaannut pinaveersaartitsinermut atorneqartussaangaluarput.
Peqqinnissaqarfiillu aqutsisui ulluinnarni ingerlatsinerat, tassani sulisoqarnikkut sulisullu sulinissaannut pilersaarusiornerit isumagisaringaat erseqqissaassutigaa. Taamaattumik Narsami allannguutit aalajangersimasut pillugit apeqqutissaqartoqarpat, aqutsisut innersuussutigai.
Wangenheim, atorfiit atorunnaarsinneqarsimanerinut ikilisimanerinulluunniit, nakorsaqarnerup allanngortinneqarsimanera peqqinnissaqarfiulluunniit qanga kingullermik nakorsaqarsimaneranut tunngatillugu, akissuteqanngilaq.
Anna Wangenheim napparsimasut isumannaatsuunissaasa aalajangersimasumik naliliiffigineqarsimanerat allannguuteqartoqarneranulluunniit atatillugu naatsorsuutiginngisamik pisut nalunaarsorneqarsimanerat pillugu aamma akissuteqanngilaq.
Taarsiullugu Nunatsinni Nakorsaaneqarfiup suliatigut nakkutilliinera, pitsaassutsimik qulakkeerinnittartussat peqqinnissaqarfimmilu, ilungersunartunik suussusersiisussat aaqqiissutissanillu siunnersuisartut, tassa aqutsinermik misissuisut innersuuppai.
Wangenheimip pingaartumik inoqarfinni mikinerni peqqinnissaqarfinni sulilersitsiniarnerup sulisoqarniarnerullu ajornartorsiutaanera aamma nassuerutigaa. Peqqinnissaq pillugu isumaqatigiissutissami peqqinnissaqarfiit suliassaasa oqaloqatigiissutigineqartarnissaannut sulisoqartariaqarnermullu tunngatillugu ilaatigut malitassaqassaaq.
Siaruaassinnaasoq
Berit Bygip sinerissami nakorsassaaleqineq Narsamilu peqqinnissaqarfimmi atugassarititat isornartorsiuinini tamanut saqqummiuttareerpaa.
Ulluinnarni sulisut suliamik ataqatigiisinnissaannut immikkut piffissaqartariaqarnerat nukissamillu atuiffigisariaqarnera nassuiaatigaa.
Tamanna qaangiuttoornernik, sulinngiffissaraluit annaaneqartarnerannik suliassaqarfiginngisamilu suliniarnermi namminersorluni piareersartariaqarnernik kinguneqarsinnaapput.
Berit Bygip oqarneratut sulisut ilungersorlutik sulinerinit peqqinnissaqarfiup sullissinerlunnerulersimanera takuneqanngitsoorsinnaavoq. Sulinermilu artukkerneqarnerujussuaq peqqutaalluni sulilersitsiniarnerit sulisoqarniarnerillu ajornarnerulersinnaapput.
Narsami ilungersuuteqarnerup illoqarfinnut allanut siaruaassinnaanera ernumassutigaa, atugassarititallu allat, soorlu Kangaatsiamiinnermini misigisimasani eqqaallugit Qeqertarsuarmilu ajornartorsiuteqartoqarnera aamma oqaluttuaraa.
Innuttaasut paasitinneqartariaqartut
Berit Bygip ammaffigeqatigiinnginneq aamma isornartorsiorpaa. Nakorsaqarniarnerup sulisoqarniarnerullu tungaatigut allanngortoqarpat, innuttaasut peqqinnissaqarfimminni susoqarnera paasisaqariaqarpaat.
- Innuttaasut tamakku pissutsit pillugit paasitinneqartariaqarput. Nipangiussiinnartarnerit nalunaarutiginnittannginnerillu kamaatigeqaakka.
Innuttaasut qanoq naatsorsuuteqarnissartik ilisimaniassammassuk, politikkikkut salliunneqartut pillugit eqqortumik nalunaaruteqartoqarnissaa kissaatigaa.
-Illoqarfinni minnerni sulisukinnerunissaq anguniarneqarluni ammasumik oqaatigineqarpat, taava paasissuarput qanoq naatsorsuuteqassanerluta.
Berit Bygip oqarneratut innuttaasut naatsorsuutigisaminnik ikiorneqarsinnaanngikkaangamik sulisunut ilungersunartaqaaq. Sulisunut ilungersunartunik atugassarititaqareersunut qaavatigut artukkiisarpoq.
Tamanna ilaatigut tunngavigalugu Narsamit aallassaaq, naak utoqqalinersiaqalernissami tungaanut nunatsinniiginnarniaraluarluni.
Innuttaasut peqqinnissaqarfimmi ikiorserneqarsinnaanerisa nalorninarsiartuinnarnerani, sulisut sinneri akisussaaffeqarnerulernissaat ernummatigaa.
KNR-ip peqqinnissaqarfik nakorsaqarniarnermut, sulisoqarniarnermut, missingersuutinut napparsimasullu isumannaatsuunissaannut tunngatillugu apersorniarsimagaluarpaa, uumalli allaaserisap saqqummiunneqannginnerani akissutisinngilaq.
