Nunatsinni inuit sulisinnaasut amerliartunnginnerat pissutigalugu peqqinnissaqarfimmi aaqqiissuteqarallartarnerit pisariaqartut

Erseqqissaaneq: Peqqissutsimut inunnullu Innarluutilinnut Naalakkersuisoqarfik KNR-imut saaffiginnissuteqarpoq ineqarneq kisimi Danmarkimit akilerneqartassasoq. KNR-ip kukkuneq iluarsivaa.

Nunatsinni peqqinnissaqarfinni peqqissaasunik nakorsanillu amigaateqartoqarnera pissutigalugu Danmark Kalaallit Nunaallu maajimi isumaqatigiissuteqarput.

Isumaqatigiissutip siunertaraa peqqinnissaqarfimmi atorfiit aalajangersimasumik atorfinitsitsinikkut inuttalerneqarsinnaanngitsut inuttalernissaanut iluaqutaanissaa. Isumaqatigiissummi kissaatigineqarpoq peqqissaasut nakorsallu Danmarkimiittut Kalaallit Nunaanni peqqinnissaqarfimmut suliartortarnissaat.

Isumaqatigiissutip aamma siunertaraa sulisut tikittussat nunatsinni sulinermik misilittagaqareernissaat suleriutsimillu ilisimasaqareernissaat, tassaanatillu atorfinittut nutaat piffissami killilimmi suliartortut.

Aningaasaqarniarnikkut sipaarniartoqassappat taama aaqqiisoqartariaqartoq Naalakkersuisup Anna Wangenheimip oqaatigaa:

- Tassa sulisussat ima amigartigipput ukiuni kingullerni arlaqalersuni aningaasartuutigut qaffarujussuarnikuummata 150 procent tikillugu sivikitsumik taartaajartortartunut akissaatitigut annertunerulernikuuvoq, taanna oqarpoq nangillunilu:

- Taamaammat piviusuuvoq, taannalu iliuuseqarfigiumallugu aamma sulisoqarnikkut illersuinerusumik aaqqiissummik nassaarniarluta aalajangerpugut naalagaaffimmik suleqatiginninnerput annertusassagipput isumannaatsumik nakorsiartussat eqqarsaatigalugit aaqqiiniassagatta.

Isumaqatigiissummi massakkut atuuttumi, peqqissaasut Danmarkimiit nunatsinnut suliartortut ineqarnerat angalanerallu nunatsinnit akilerneqartarpoq. Isumaqatigiissummili septembarimi atuutilersussami ineqarneq Danmarkimi nunap qitiusumik immikkoortuinit akilerneqartalissasut Anna Wangenheimip aamma oqaatigaa.

Inuit sulisinnaasut ikiliartortut

Peqqinnissaqarfimmi sulisussaaleqisoqartuarnerup kingunerisaanik siunissamut qaninnerusumut iluarsiipallannerit peqqissaasut ilaannit naammatsiffigineqarput:

- Taanna aamma qasunarpoq peqqinnissaqarfimmi sulilluni, soorlu uungaaraannaq isigineq sukkasuumik ukua qaangiutsipallatsigit, uani isiginiartussaanerugunaraluarpagut qanoruna ililluta peqqinnissaqarfimmi sulisut ataavartumik paarissagivut?

Dronning Ingridip Napparsimmaviani peqqissaasoq Paninnguaq Boassen oqarpoq.

Partiinit amerlanerussuteqartunit ukiuni qulikkaani atuuttussamik peqqissutsimut tunngatillugu 2023-mi isumaqatigiissuteqartoqarpoq.

Tassani peqqinnissaqarfinni sulisussarsiortarneq sulisut sulisoriinnarnerat ilinniartitaanerlu qulequttanut pingaarnernut ilaapput.

Nunatsinnili sulisinnaasut amerliartunnginnerat pissutigalugu siunissamut qaninnerusumut iluarsiigallarnerit pisariaqavittut Anna Wangenheimip oqaatigaa:

- Piviusoq una avaqqussinnaanngisarput tassaavoq, inuiaqatigiinni aamma inuit sulisinnaasut ikiliartormata, taamaattumik suliassaqarfiit tamarmik aamma ilinniarsimasunik sulisussanik noqqaapput, taanna oqarpoq.

Pilerinarsaanissamut sulisoqartoq

Peqqinnissaqarfimmi nunaqavissut sulilernissaannut sooq pilerinarsaasoqartannginnersoq, Paninnguaq Boassenip aamma apeqquserpaa.

Pilerinarsaasoqassappallu Peqqissaasut Kattuffiat pingaarutilimmik suliassaqartoq peqqissutsimut naalakkersuisoq isumaqarpoq. Naalakkersuisulli suleqatigiinnissamut piareersimapput.

Peqqissaasunut ikiortit peqqissaasutut ilinnianngikkaluarlutik pikkorissartarnerminni peqqissaasutulli allagartaqarlutik sulilersinnaanissaannut periarfissaqalernissaat sulissutigineqarpoq.

- Nunanit allanit sulisoqarnikkut avaqqussinnaanngisatsinnik inissisimaneq eqqarsaatigalugu minnerunngitsumillu peqqissaasunngorusullutik ilinnialerusuttut ikiortit merit-eqarnissaminnut periarfissaqalernissaat, siunissamut ungasinnerusumut pilersaarutitta ilagaat, Anna Wangenheim oqarpoq.

Pilersaarutigineqartut saniatigut passussinermi sungiusarfissamik pilersitsisoqarnissaanut aningaasaliisoqaqqammertoq suliarinnittussarsiuussisoqartorlu naalakkersuisup ilanngullugu oqaatigaa.

Isumaqatigiissutit pillugit paasititsiniaasoqarnerusariaqartoq

Isumaqatigiissummut tunngatillugu apeqqusiisoqareersorlu sulisitsisut sulisorisaminnut isumaqatigiissutip qanoq imaqarneranik qanorlu iluaqutaanissaanik paasititsiniaanerunissaat peqqissutsimut naalakkersuisup pisariaqarnerarpaa:

- Apeqqusiisinnaaneq taanna apeqqusinngilluaasarpara, inissaminiippoq. Kisianni ersersitsivoq uannut, paasissutissiineq aamma sukumiinerusoq peqataatitsinerusorlu pisariaqarsinnaasimasoq.

Taamaammat paasititsiniaasoqarnerunissaanik suliamik aallartitsisoqartoq iluaqutaanissaalu neriuutigalugu, Anna Wangenheim oqarpoq.