USA-p, Kalaallit Nunaata Danmarkillu illersornissamut isumaqatigiissutaat Inatsisartuni marlunngornermi oqaluuserineqassaaq inaarutaasumillu akuersissutigineqarnissaa naatsorsuutigineqarluni.

Isumaqatigiissut Nuummi akuerineqarpat Folketingimi novembarip 19-anni atuutilersinniarlugu aalajangiiffigineqassaaq.

Isumaqatigiissutip, USA-p præsidentia Donald Trump, qiterpaarluni qinersisoqarnissaanut atatillugu Danmark Kalaallit Nunaannik USA-mut tunniussinerarpalullugu sapaatit akunnerini kingullerni oqariartuuteqareersorlu, atuutsinneqalernissaa suliniutigineqalissaaq.

Danskit nunanut allanut ministeriata Lars Løkke Rasmussenip (Moderaterne), nalunaarutit taamaattut Trumpip republikanerit USA-mi qiterpaarluni qinersoqarnissaani novembarip pingajuanni pisussami ajugaanissaat qulakkeerniarlugu iliuuseqarneratut isigai.

- Isumaqatigiissut taanna sumi tamani nuannaarutigineqarpoq, Trumpillu qineqqusaartitsinerni oqaaserisimasai takusinnaavakka, tamannalu qiterpaarluni qinersoqarnissaanut atatillugu Trumpip attaveqariaasiatut isigaara.

- Isumaqatigiissutigisagut isumaqatigiissuteqarfigisatsinnit arlaannaannilluunniit nalornissutigineqanngillat, uangalu USA-mi isumaqatigiissummik allamik atsiorniarlunga sapaatip-akunnerata siuliani tasamaniippunga, Lars Løkke Rasmussen ataasinngornermi unnukkut USA-mut mittoq taama oqarpoq.

MAGA-mut attaveqarneq

Illersornissaq pillugu isumaqatigiissut New Yorkimi septembarip 22-anni atsiorneqarpoq.

Illersornissaq pillugu isumaqatigiissummi, 1951-imi isumaqatigiissummik nutarterinermi, sumiiffiit marluk, Narsarsuaq aamma Mestersvig, Amerikamiut sakkutooqarfittaarfissaattut toqqarneqarput.

Amerikamiut pilersaarutitik suli saqqummiunngillat.

- Isumaqatigiissut tamanna piviusunngortinneqassaaq, Amerikamiulluqanoq iliorniarnersut takujumaarparput. Præsidenti tusarnaarukku sakkutooqarnikkut aningaasaliinerpassuit qanittukkut pissapput, tamannali tigussaasumik ilisimasaqarfiginngilarput, Løkke oqarpoq.

Lars Løkke Rasmussen Demokratit partiianni Atlantami USA-mi qinersisartunut aaqqissuussinermi peqataasoq.  Assi © : Mads Claus Rasmussen/Ritzau Scanpix

Donald Trumpip inoqatinut attaveqatigiittarfiutimini Truth Socialimi assiliaq Kalaallit Nunaata mittarfissuatut imaluunniit sakkutooqarfittut isikkulik arfinginngormat ilaatigut saqqummiuppaa.

- Eqqarsarpunga MAGA-mut (Trumpip qinersisartuinut, aaqq.) attaveqarnerusoq, Løkke oqarpoq.

Partiit naalakkersuisooqataasut illersornissaq pillugu isumaqatigiissut, Naleqqamit isorineqartoq, akueriumavaat.

Partiip illuatungiliuttup USA-p aningaasanik nunatta karsianut akiliisarnissaa aamma kalaallit suliffeqarfii Amerikamiut sakkutooqarfigisassaanni kiffartuussinissaat isumaqatigiissummi qulakkeerneqartariaqaraluartoq, KNR-imut siusinnerusukkut oqaatigaa

USA-llu Kalaallit Nunaanni eqqagakuminik piiaanissaa isumaqatigiissummi naammattumik qulakkeerneqarsimannginnera, Naleqqap aamma isoraa.

Danskit naalakkersuisuisa isumaqatigiissummik saqqummiussineranni tamanna killormut, USA-p avatangiisinut eqqagakunillu piiaanissaa qulakkeerneqarsimasutut oqaatigineqarpoq, tamannalu isumaqatigiissummi 1951-imeersumi ilanngunneqarnikuunngilaq.

RITZAU