Polar Seafood Doris J. Jensen pillugu: Paasissutissanik eqqunngitsunik ulorianartunik siammarterivoq
- Aalisartut aamma qularnaveeqquteqalissapput, massakkut motorimik ajutooraangamik allatut ajornartumik selskabersuarnut aningaasanik atortarput, taavalu pituttugaalerlutik, allatut oqaatigalugu inussiaalerlutik. Taanna ajorpoq. Taannalu uagut unitsikkusupparput.
Doris J. Jensen (Siumut) Inatsisartut ataatsimiittarfianni aalisarnermut inatsisissatut siunnersuutip maajip qulingani aappassaaneerneqarnerani oqarpoq.
Taassuma Polar Seafoodip sinerissap qanittuani aalisartunut umiatsiamik pisiniarnerminni aningaaserivimmit atorsinnaanngitsunut atortitsisarneranut innersuussilluni oqarpoq.
Oqaaseqarnerlu tamanna appisaluunneqartumut narrujuumminarpoq.
Bent Salling Polar Seafoodimi pisortaavoq, taassumalu suliffeqarfiup ataatsimoornermut tapersiiniarsarisumut taama pasiilliuteqartoqarnera narrujuummissutigaa.
- Inuttut aamma eqqortinnartorujussuuvoq. Tassami inussiaateqartutut taagorneqarluni, aammalu suleqatit inussiaatitut taagorneqarneri tulluartuusorinngilluinnarpara.
Siumumit iperteriniarneq pakatsinartoq
Bent Sallingip oqaaseqarneq tamanna imminut inuttut suliffeqarfimmut eqquiinnanngissoraa. Tamannami inuiaqatigiinnut tamanut sunniuteqarpoq.
Tamannalu inuiaqatigiinnit qinikkap tamanna paasisinnaasariaqaraluaraa taanna oqarpoq. Taamaammallu Doris J. Jensenip oqaaseqarnera suli pakatsissutigineruaa:
- Qinigaanikuuvoq, pingaaruteqartorujussuarmillu inissisimaffeqarluni, arlaannillu aalajangiisinnaaguni paasissutissat eqqortut atorlugit oqariartortussaagaluarpoq. Taamaammat uani oqariartuuteqarnera pakatsinarluinnarpoq.
Bent Sallingip Doris J. Jensenip oqariartuuteqarnera eqqunngitsumik paasissutissiinerunerarpai.
Pingaartumik Inatsisartuni oqaaseqarnermini kingusinnerusumi Polar Seafood aningaasanik nunatsinnit annissuisutut taakkartormagu:
- Nunatsinnit aningaasanik annissuisutut taakkartorniarsarigaluarpaatigut, kisianni taanna ilumoortortaqanngilaq. Aammalu taama iperteriniarneq tulluartuusorinngilara nunatsinni qinikkaninngaanniit paasissutissanik eqqunngitsunik annissuineq.
Doris ajuusaartoq
Doris J. Jensenip KNR-imit apersorneqarnissaminut periarfissaqanngilaq, mailikkulli allappoq:
- Aalisarneq iluaqutigalugu nunatta aningaasarsiornerusinnaanera pillugu oqaatsikka attappakka, aamma isumaqarpunga kingullertigut saqqummiunneqartartut oqaatigisimasannut tunngavilersueqqittartut. Allatut isumaqartoqassappat tamanna ataqqivara, Doris J. Jensen allappoq, nangillunilu:
- Aalisartut pillugit Inatsisartuni oqaaseqarninni oqaaseq “inussiaatitut” atorakku tamanna soorunami assorsuaq ajuusaarutigaara. Tassami taamak paaseqqunanngikkaluartoq, aalisartunik illersuiuummernerup kinguneranik taamak oqaasertaliisimavunga.
Nassuiaalli tamanna Bent Sallingip isumassaqartippallaanngilaa. Taassumalu Inatsisartut ataatsimiittarfiani taama oqaaseqartoqarsinnaanera akuersaarneqarsinnaanngissoraa:
- Pakatsinarluinnaqqissaarluni. Ataatsimiittarfiit nunatsinni ataqqinarnersaanni, akuersaarneqarsinnaasoq taamatut oqariartorsinnaaneq. Massakkut pissutsit aallaavigalugit inussiaateqarneq nunatsinni atuutinngivissormat.
