DR nunatsinnut juullimi inuulluaqqussummik aallaakaatitseqqissanngitsoq
‘Julehilsen til Grønland’ DR-ip 2024-mi juullimi aallakaatitassaanut ilaanngilaq. Nunatsinnummi ukiorpassuarnimi ukiut tamaasa juullimi inuulluaqqusilluni aallakaatittakkani taanna siorna naggammik aallakaatikkini, DR nittartakkamini sisamanngornermi ullaakkut nalunaarpoq.
‘Julehilsen til Grønland’ radiokkut 1932-miit ukiuni tulliuttuni 50-ini aallakaatittareerlugu TV-kkut 1983-imili aallakaatittaritsik, DR- allappoq.
Aallakaatitassiap taassuma ullutsinnut naleqqukkunnaarnera, DR-ip nunatsinnut juullimi inuulluaqqussummik aallakaatitseqqinniannginnerminut tunngavilersuutigaa.
- Aallakaatitassiaq taanna qallunaat kalaallillu atassuteqaqatigiinnissamik ullutsinni attaveqaatitulli ittunik attaveqaatitigut periarfissakikkallarmata aallakkaatinneqartalerpoq, DR Kultur, Debat & Musikimi aaqqissuisuuneq Gustav Lützhøft DR-ip nittartagaani issuarneqarpoq.
Naalagaaffeqatigiinnermut tunngasunik aallakaatitsisaannassasoq
Tassa ‘Julehilsner til Grønland' aallakaatitseqqittussaajunnaaraluarlutik naalagaaffeqatigiinnermut tunngasunik aallakaatitsisaannassallutik allaallumi immaqa aallakaatitsinerusalissallutik, Gustav Lützhøftip neriorsuutigaa.
- ’Julehilsen til Grønland’-imik aallaakatitseqqittussaannginnerput naalagaaffeqatigiinneq pillugu nutaanik aallakaatitassiornerulersinnaanissatsinnik malitseqartussaassaaq, tassa taamaalilluta ullutsinni naleqqunnerusunik aallakaatitassiortalernissatsinnut periarfissaalluarsoraara, Gustav Lützhøft oqarpoq.
Tassa qallunaat nunatsinniittut angajoqqaaminnut ilaquttaminnullu juullimi unnuami ataatsimi marlunniluunniit akeqanngitsummik inuulluaqqussuteqarsinnaanersut, Upernaviup kujataani Kangersuatsiami aalisartitsisup Andreas Lund-Drosvadip (“Suku”) apeqqutigimmaguli, ’Julehilsen til Grønland’ 1932-mi aallakaateqqaarneqarpoq.
