Nuummut Nuummiillu timmisartuussinerit taamaatiinnarneqartut

Nuummut Nuummiillu timmisartuussinerit tamarmik ataasinngornermi taamaatiinnarneqarput.
Tamanna Greenland Airportsip nittartagaani takuneqarsinnaavoq.

Timmisartut arfinillit Nuummiit aallartussaasimagaluarput timmisartullu qulit ataasinngornermi matumani apriilip 20-anni mittussaasimagaluarlutik, tamarmillu taamaatitatut maanna allassimalerput.

Timmisartuussinerit Ilulissanut, Sisimiunut Københavnimullu tunngasuupput.

Timmisartuussinerit taamaatiinnarneqartunut Nuummi nunallu sinnerani anorersuarnera pissutaasoq, Air Greenlandimit KNR-imut ilisimatitsissutigineqarpoq.

Nuna tamakkerlugu eqqugaasoq 

Nuuk kisimiinngilaq aammali nunap sinnerani timmisartuussinerit silarlunnera pissutaalluni eqqugaapput. 

Taama Air Greenlandimi attaveqaqatigiinnermut pisortaq, Inga Dóra G. Markussen KNR-imut ilisimatitsivoq.

-Tallimanngornermi ullumimut anorersuarnissaa, anorip sukkanerpaaffissaa 60 knobit (30 m/s) tikissagaa, siumut ilimasaarutigineqareerpoq. 
Tamanna pissutaalluni Atlantiku qulaallugu timmisartunik marlunnik Nuummut ippassaq tikisitsivugut, sinerissamiittullu ingerlaqqitsillugit, taamaalillutik Atlantikukoortussat apuussinnaaniassammata, taanna oqarpoq nangillunilu:

- Ullumi takusinnaavarput Nuuk eqqarsaatigalugu silarlunnera taama sakkortutiginngitsoq. Kisianni Ilulissat, Aasiaat Kulusullu eqqaassanngikkaanni, silarlunnera pissutaalluni timmisartuussinerit tamangajammik taamaatiinnarneqarput.

Ilulissat eqqaanni nunaqarfiliartartut suli ingerlasut taassuma aamma ilisimatitsissutigaa.

Immaqa aamma marlunngornermi silarlussaaq 

Aasiaat kujasimmik kujasik kangisimmillu sakkortuumik anorersuassasoq, DMI-mit ilisimatitsissutigineqarpoq.

Anorip ullaakkut nalunaaqutaq qulinut sukkassusia 15 m/s-iuvoq anoraasuarneralu 24 m/s-iulluni. Ualineranili suli sakkortusiartornissaa ilimasaarutigineqarpoq. DMI-p nalunaarutaa naapertorlugu anori nalunaaqutaq 17.00-ip missaani sakkortunerpaaffissaminiilernissaa ilisimasaarutigineqarpoq, tassani 20 m/s missaaniilerluni anoraasuartarneralu 28,3 m/s-iussalluni.

Anori nalunaaqutaq 19.00-ip missaani qasukkariartulissaaq. Marlunngornermili suli anorsarissangatinneqarpoq, piffissalli ingerlanerani sakkukinnerulissaaq. 
Air Greenlandip marlunngornermi timmisartuussinissat qanoq eqqugaassanersut suli oqaatigisinnaanngilaa:

- Akunnerit 48-t siumut misissortuarpugut. Timmisartuussinissap ajornakusuulernissaa takugutsigu ingerlaannartumik iliuuseqartarpugut. Taamatullu suleriaaseqarnerput ingerlatiinnassavarput. Marlunngornermi timmisartuussisinnaanissarput suli neriuutigaarput, timmisartuussinerit suli taamaatiinnarneqanngillat, Inga Dóra G. Markussen oqarpoq.

Sila tassanngaannaq allanngussagaluarpat angalasussat attavigineqassapput. Angalanissamut pilersaarutit nutaat nassiunneqarsinnaammata, angalasussanut mailit sms-illu nakkutigeqquneqarput.