Nuummi angerlarsimaffeqanngitsut majuartarfeqarfinni sinittartut najugaqartunut toqqissisimanngitsitsisut

Naqqiut: Kalaallit Nunaanni Politiit KNR-imut allakkatigut akissutertik erseqqissarlugu attaveqarsimapput. KNR-ip politiit oqaaseqaataat paatsoorsimavaa taamaattumillu allaaserisaq naqqillugu. Politiit nalunaarutiginninnerit ilaanni nalunaarsorneq ajoraat, allaaserisami siusinnerusukkut allaqqavoq. Tamanna ilumuunngilaq. Nalunaarutiginninnerit tamarmik politiinit nalunaarsorneqartarput. Kukkuneq KNR-imit ajuusaarutigineqarpoq.

Qapiarfiusaami najugaqarfimmi, blok 17-imi najugaqartut angerlaraangamik angerlarsimaffeqanngitsut majuartarfeqarfiit ataanni sinittut naammattoortarpaat.

Majuartarfeqarfinnili taamaallaat sininneq ajorput.

Najugaqarfik hashimik, imigassamillu atuiffinngorlunilu perusuersartarfittut atorneqartarpoq, tamannalu najugaqartut oqarnerat naapertorlugu ullup qanoq ilinerani tamani pisarpoq.

Toqqissisimanngissutaasoq

Toqqissisimannginnermik pilersitsisoq, taakku arlallit KNR-imut oqaatigaat.

Naallu pissutsit ukiuni kingullerni marlunni ajorneruleraluartoq arlalinnillu naammagittaalliuuteqartoqaraluartoq ajornartorsiut iliuuseqarfigineqanngilaq.

- Qaammatip naanerani tallimanngornermi  inuit tallimat anisitaapput, politiinut sianertuarpugut toqqissisimannginnatta, blok 17-imi najugaqartoq, Nukaaka Tobiassen, KNR-imut oqarpoq.

- Nuanninngitsorujussuuvoq inooqatigalugit, Nukaaka Tobiassen ineqarfiit majuartarfiini imertoqartarnerani, ikiaroortoqartarnera perusuersartoqartarneralu pillugit oqarpoq.

Ineqarfinni najugaqartut arlallit pissutsit, pingaartumik qaammatini issinnerani pisartut naammagittaalliutigereerpaat.

Nuummi Kommuneqarfik Sermersuup angerlarsimaffeqanngitsunut unnuisarfiutaanni sinittartut angerlarsimaffeqanngitsut 127-t januaarimi nalunaarsorneqarput.

Oqartussat ilaanni ikiuuttartut

Nukaaka Tobiassenip najukkamilu sanilerisaasa angerlarsimaffeqanngitsut majuartarfeqarfinni naammattooraangamikkit politiinut siarngutigisarpaat. Politiilli anisitsiartorlutik takkuttuaannanngillat, taakkumi allanik suliassarpassuaqartarput.

Nukaaka Tobiassenip oqarnera naapertorlugu ineqartut namminneq anisitsinissartik akisussaaffigigaat oqaatigisimavaat.

Politiit KNR-imut allakkatigut akissuteqarlutik ilisimatitsipput, suliat tamarmik nalunaarsorneqartartut, sulialli angerlarsimaffeqanngitsunut tunngasut politiinit naatsorsorneqaqqissaarneq ajormata, politiit kisitsisinik eqqortunik takussutissaateqanngitsut taamaattumillu suliat angerlarsimaffeqanngitsut najugaqarfinni toqqissisimajunnaartitsinerannut tunngasut qassiuneri sukumiisumik oqaatigisinnaanagit. Aammattaaq politiit inuiaqatigiinni angerlarsimaffeqanngitsunut ilungersunartut oqaaseqarfigisinnaanagit allapput.

Ineqarfimmi najugaqartut politiinut attaveqartarnermi saniatigut oqartussanut arlaleriarlutik aamma saaffiginnissuteqarput.

Taakkuli Nukaaka Tobiassenip ineqarfimmilu sanilerisaasa ulluinnarni ajornartorsiutigisaannut pissutsinut aamma aaqqiissuteqanngillat.

- Ajornartorsiutigineqartoq aallartimmalli saaffiginnittaleraluarnikuuvunga, ullut tamakkiasarlugit ilaannikkut kisianni akineqanngisaannarpunga, Nukaaka Tobiassen oqarpoq.

Inissiaatileqatigiiffiup INI A/S-ip majuartarfeqarfinni ajornartorsiutaasut ilisimaaralugu KNR-imut allappaa.

- Angerlarsimaffeqanngitsut inissiat majuartarfinniittarnerat inissiaatileqatigiiffimmit ilisimavarput, najugaqartut toqqissisimanatik INI A/S-mut saaffiginnittarput tamannalu ilungersunartutut isigaarput, inissiaatileqatigiiffik KNR-imut allappoq.

Maalaarut itigartitsissutigineqartoq

Nukaaka Tobiassenip naammagittaalliutini Ineqarfik pillugu Maalaaruteqartarfimmut aamma annguppai.

Ineqarfik pillugu Maalaaruteqartarfiup maalaarut inissiani ataatsimoorussaniittut imaluunniit inissiani najugaqartuunngitsut pineqarmata maalaaruteqartarfiup iliuuseqarfigisinnaanngikkai, taakku Nukaakap saaffiginnissutaanut akissummi paasissutissiipput.

Ineqarfik pillugu Maalaaruteqartarfik tassunga atatillugu Nukaaka Tobiassenip naammagittaalliutaa suliarisinnaanagu taamaammallu itigartitsissutigisariaqarlugu allappaa.

Inissiaatileqatigiiffiup INI A/S-ip inissiat isaariaasa parnaartartunngortinnissaat suliaralugit aallartinneqalersut KNR-imut akissummini paasissutissiissutigaa.

Tamannali teknikkikkut pilersaarusiorneqartariaqarluni suliarineqaqqaartariaqarmat ajornartorsiutip aaqqiissuteqarfigineqarnissaa piffissamik atuiffioqqaassasoq, taakku allapput.