Nutaarsiassat Sermitsiaq.AG-kkut KNR.GL-ikkoortullu akeqartalernissaat siunnersuutigaa

Naak tusagassiuutitigut Nunatsinni unammillertoqarnerulersimagaluartoq, Sermitsiaq AG-p, akileraarutit ilanngaatigereerlugit sinneqartoorutai 2012-imi 4,7 millionit koruuniusimariarlutik, siorna 3,3 millionit koruuniusimapput.

Allattoq Mads Lynge

marsip 04-at 2014 14:51

Angusaq naammaginanngitsutut nalilerneqarpoq, namminerlu aningaasaatit ukiup kingulliup ingerlanerani 3 millionit koruuninik amerlisimanerat, Sermitsiaq AG-mut pingaaruteqarpoq, tassami siunissaq eqqarsaatigalugu Sermitsiaq AG-p aningaasaqarniarnera patajaallisarneqartariaqartoq, Sermitsiaq AG-p pisortaata, aaqqissuisuuneratalu, Poul Krarupip oqaatigaa.

Nassiussinermut tapiissutit 2010-mi januaarip aallaqqaataani atorunnaarsinneqarput, soorlu Danmarkimi naalakkersuisut aamma taama aalajangigaqartut. Millionilippassuit taamanikkut sipaarneqarput, Sermitsiaq.AG-lli aningaasaqarniarnera taamanikkut eqqorneqarpoq:

- Nutaarsiassap akileqqaarlugu atuarneqarsinnaanissaa Nunatsinni periarfissaasinnaavoq, tassa nammineq suliarisimasarput atuarneqassappat, akiliisoqartarnissaanik periarfissiisoqarsinnaavoq. Tassami tusagassiortut akissarsiaqarlutik sulipput, Poul Krarup oqarpoq.

Tassa imaappoq, assersuutigalugu Sermitsiaq.AG-p aningaasaqarniarnera patajatsuussappat nammineq suliat inuttaasunut akeqartariaqalersinnaassapput, aviisi taamaalilluni aningaasarsiorsinnaalluarnerussammat.

Nutaarsiassammi nittartakkatigut atuarneqarsinnaasut amerlasuut akeqanngitsumik ilaatigut atuarneqarsinnaapput, inuillu tamanna sungiutiinnarnikuuaat, nutaarsiassalli Sermitsiaq.AG-miittut siunissami atuarniaraanni akileeqqaarnikkut aatsaat tamanna pisinnaalissagunartoq, Sermitsiaq.AG-p aaqqissuisuunerata oqaatigaa, tassungalu atatillugu KNR aamma eqqarsaatigineqartariaqartoq, oqaatigalugu:

- Kisimiilluta taamaaliorsinnaanngilagut, tassami KNR-eqarpoq aamma, aaqqissuisuuneq oqarpoq, eqqaasitsissutigalugulu nutaarsiassat KNR-ikkoortut akeqanngitsumik atuarneqarsinnaasut.

Taamaattuaannartariaqanngilarli, oqarpoq, nutaarsiassat KNR-imi atuarneqarsinnaasut akileeqqaarnikkut atuarneqarsinnaanissaat takorloorlugu.

Nutaarsiassaleriffiit taakku marluk nittartakkatigut aamma suleqatigiilersinnaanissaat periarfissaasoraa, Nunatsinnimi innuttaasut taama ikitsigitillugit suleqatigiittoqartuuppat iluaqutissartaqarnerusorigamiuk:

- Nunatsinni 56.000-iuvugut, avataaninngaanniillu unammillerteqarpugut, nittartakkatigullu nutaarsiassat pillugit suleqatigiittoqarpat, tassuunatigut unammillersinnaassuseqarnerusinnaassaagut, Poul Krarup oqarpoq.

Kalaallit Nunaanni nutaarsiassatigut suliffeqarfiit akornanni unammilleqatigiittoqarnera, suliffeqarfiit aningaasarsiornerannut sunniuteqartoq, Poul Krarup oqarpoq, soorlu suliffeqarfiit namminersortut akornanni unammilleqatigiinneq taama sunniuteqartartoq. Suliffeqarfiillu aningaasarsiorluarniarunik, assersuutigalugu aviisitigut pilerisaaruteqartarput, Sermitsiaq.AG-llu isertitaasa ilaat pilerisaarutinit, suliffeqarfiillu sulisussarsiornerminni takoqqusaarutinik ikkussisarnerat Sermitsiaq.AG-mut aamma isumalluutaalluni.

Pisortalli suliffeqarfii, suliffeqarfiillu Namminersorlutik Oqartussanit pigineqartut sulisussarsioraangamik, takoqqusaarutinik akikitsunik Danmarkimi takoqqusaaruteqarnerusalernikuupput, Nunatsinni, assersuutigalugu Sermitsiaq.AG-kkut, takoqqusaaruteqartarunnaarlutik.

Pisortallu suliffeqarfiutaasa Kalaallit Nunaanni tusagassiuutini takoqqusaaruteqarnerusalernissaat, Poul Krarupip oqaatigaa

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.