Nunatsinni peqqissaavinni sulisussaaleqineq naalagaaffiup ikiorsiineratigut matussuserneqassasoq
Narsami peqqissaasup soraarniuteqarnera pillugu Narsallu ipisinneqarnissaanik ernummateqarnera pillugu, KNR-imit sapaatip akunnerata siuliani allaaseraarput.
Narsami peqqissaasup Berit Bygip peqqissaavinni sulisussaaleqineq nunatsinni sinerissamut siaruaakkiartortoq oqaatigaa.
Nunatsinnili peqqissaavinni sulisussaaleqineq Danmarkip nunattalu peqqinnissaqarfiit pillugit isumaqatigiissutaata siunissami qaninnerusumi matussusissagaa, Peqqissutsimut inunnullu Innarluutilinnut naalakkersuisoq Anna Wangenheim (D) KNR-imut oqarpoq.
- Siornali naalakkersuisoqatigiit ivertinneqaratta erngertumik, tassa naalagaaffimmut assammik isaassisimavugut. Ilaatigut ukiorpassuarni ingerlareermat taanna sulisussaaleqineq iliuuseqarfigineqartariaqartoq.
- Taamaalilluta qitiusumik napparsimaveqarfiit Danmarkimiittut pitsaassuseqartumik sullissisinnaassuseqartut nunatsinnut tikisittalernissaat pisussaaffilikkamik taanna anguniarsimavarput, taanna oqarpoq.
Nunatsinnut suliartortussat ukioq naatinnagu tikereersimassasut
Atorfiit arlallit inuttalerniarlugit danskit peqqissaasut nakorsallu aaqqissuussinermi nikittaallutik atorfinitsinneqartalernissaat, Danmarkimi nunap qitiusumik immikkoortuisa nunatsinnilu peqqinnissaqarfiup maajimi isumaqatigiissutigaat.
Nunatsinnullu suliartortussat ukioq naatinnagu amerlanerit suliartoreersimanissaat naatsorsuutigineqarpoq.
- Ukioq naatinnagu massakkut sulisut taakkua siulliit stafetaftalemik ateqartoq taanna aqqutigalugu nunatsinnut suliartukaallutik aallartittussaapput.
- Taanna aamma isumaqarpoq ulloq unnuarlu ataavartumik sulisuusut suleqateqalernissaanik. Taamaalilluta aamma qasuersaarfeqarnissaanik sulisunullu attassinissamik ineriartortitseqataanissamut aamma tapertaasinnaalluartut, Anna Wangenheim oqarpoq.
Nalunaarutit ullutsinnut tulluarsarneqartarnissaat qanoq qulakkeerneqassava?
Nalunaarut 2011-meersoq tassa Peqqinnissaqarfiup nunap immikkoortuinut aggornilersorneqarnera pillugu Namminersorlutik Oqartussat nalunaarutaat, ukiut 15-it matuma siornali atuutilersoq suli ullumikkut nutarterneqanngilaq.
Narsamilu peqqissaasutut atorfeqartutuap soraarniuteqarnermini ernumalluni saqqummiutereeraalu nalunaarutip allanngortinnissaanut naalakkersuisut siunnerfeqalersimallutik Anna Wangenheim facebookimi quppernermini allappaa.
2011-minngaanneersoq nalunaarut ullutsinnut tulluarunnaarsimasutut, allanngortariaqartutut allanngortinnissaanullu pilersaaruteqarlusi oqaatigivat taamannak nalunaarutit inatsisit ullutsinnut malinnaatinneqartuassappata naalakkersuisut qanoq iliussavisi?
- Siullertut inuiaqatigiinni aamma pissutsit allanngoriartorneranni pisussaaffeqarpugut aamma naalakkersuinikkut aamma inatsisartutigut tulluarsaassalluta, inatsisinik massakkut taanna nalunaarut oqarpunga allanngortissallugu siunnerfeqartugut kisianni taanna isumaqanngilaq immaqa ukiut 15-it tulliuttut qaangiuppata immaqa aamma allanngorteqqinneqarnissaanut killiffeqarumaarpugut.
Nalunaarutilli siunissami tulluarsarneqartassappata aningaasaqarnerup qanoq inissisimanera aamma apeqqutaasassasoq, Anna Wangenheimip oqaatigaa.
