Nunatsinni ikiaroornartut akisunerujussuat inupilunnit ikiaroornartulerisunit atorluarneqartoq
Aningaasaqarnermut najoqqutassiaq nalinginnaasoq naapertorlugu, tassa piumaneqartut aallaavigalugit akigitinneqartunik aalajangiisarneq malillugu, isumaqartoqarsinnaavoq nunatsinni "apummut" akigititaasut Danmarkimit akikinnerusut.
"Apulli" oqaasiliatut atorneqaraangat – tassa kokainimut – killormut inissisimasoqarpoq. Nunatsinni ikiaroornartunut akigitinneqartut kunngeqarfiup kujasinnerusortaanut naleqqiullugit quleriaammik qaffasinnerusut, tamannalu pinerlunniat ornigaraat, DR Nyheder allappoq.
– Isumaqarpugut aaqqissuussaasumik pinerlunniartartut Danmarkimit nunatsinnut unioqqutitsiniarlutik angalasartut, ingammik nakuusernermit, ikiaroornartunik tuniniaanermit, agguaanermit eqqussuinermillu peqataanermikkut aningaasarsiortarlutik, taamaaliornermillu iluanaarutitik aningaasanik peqquserluttuliornermut atortarpaat, Malik Sandgreen, Kalaallit Nunaanni Politiini pinerluttoqarsimaneranik paasiniaasarfimmi pisortaq, DR Nyhederimut oqarpoq.
"Aput" akisooq
Politiit pisortaat naapertorlugu „"aput“ akisooq grami ataaseq nunatsinni 3500 koruunit aamma 4500 koruunit akornanni akeqartarpoq, Danmarkimili nalinginnaasumik 600 koruunit missaanni akeqartarluni.
Nunatsinni hashi grammi ataaseq 500-1000 koruuninik akeqartarpoq, Danmarkimili tamatuma qulerarterutaanik akikinnerusarluni.
Pinerlunniaqatigiit nunami tamatumani niuerfimmik pilersitsinissartik pilerinartittaraat, Malik Sandgreen DR Nyhederimut oqarpoq.
Nunatta nunap immikkoortuani inissisimanini tamatumalu kingunerisaanik avataanut attaveqarnerup killeqarnera pissutigalugit ikiaroornartunik assartuinissap ajornakusoornerunera pissutigalugu, akit taama qaffasitsigipput.
Aggustip qaammataani kokainimik eqqussuinermut tunngatillugu eqqartuussineq Sermersuup Eqqartuussiviani naammassineqarpoq. Kalaallit tusagassiuutaata Sermitsiap tamanna "kokaini pillugu suliatut annertuutut" taavaa.
Suliami annertuumi eqqartuussisoqaqqammersoq
Pinerlunniaasoq pingaarneq kokainimik 488,5 grammimik tigummiarsimanini pissutigalugu unnerluutigineqarpoq, tamannalu Danmarkimi ikiaroornartut pillugit sulianut sanilliullugu annikippoq, Danmarkimimi ikiaroornartunik kilorpaalunnik tuniniaasut, ilaatigut ataatsimik, marlunnik pingasunilluunniit kisitsisitalinnik oqimaatsigisunik, suliat eqqartuussissutaasarmata.
Angutip ikiaroornartut tigummiai affaata missai eqqartuussissutigineqarput, ukiunilu arfinilinni parnaarussaasussatut eqqartuunneqarpoq.
Nunatsinni kokainimut tunngatillugu suliami allami siorna juulimi arnaq kokainimik 200 gramminik anngiortumik eqqussisimasutut ukiuni sisamani qaammatinilu arfinilinni parnaarussaasussatut eqqartuunneqarpoq.
Arnap nassuiaataa naapertorlugu ikiaroornartumik nunatsinnut anngiortumik eqqussinermut 40.000 koruuninik neqeroorfigineqarsimavoq, Danmarkimilu inunnut akiitsoqarnini pissutigalugu taamaaliorsimavoq.
Pinerlunnerit taakkua inupilunnut attuumassuteqarnersut eqqartuussutini allassimanngilaq.
