Nunarput USA-p Danmarkillu aqagumit ataatsimeeqatiginissaani qaaqqusisuusoq
Joint Committeep (Ataatsimoortumik Ataatsimiititaliaq aaqq.) aamma Permament Committeep (Atajuartumik Ataatsimiititaliaq aaqq.) Nuummi decembarip arfineq-pingajuanni qulingiluaannilu ataatsimiinnissaannut nunarput qaaqqusisuuvoq.
Nunanut allanut Ilisimatusarnermullu Naalakkersuisoqarfik tusagassiuutinut nalunaarummi allappoq.
Nunatta USA-p Danmarkillu ataatsimiinnerminni suleqatigiinneq oqaluuserineqassaaq aamma inuiaqatigiinnut sakkutooqarnermullu paasissutissanik avitseqatigiittoqassalluni.
Nunatta USA-llu akornanni paarlakaattumik qaaqqusisuusoqartarpoq. Naalakkersuisut ukioq manna aaqqusisuunissartik qilanaarigaat, nunanut allanut naalakkersuisup, Vivian Motzfeldtip (S) tusagassiuutinut nalunaarummi oqaatigaa.
- Ataatsimiinnikkut oqaloqatigiiffiit pioreersut taakku aqqutigalugit illuatungeriinnut tamanut iluaqutaasumik kalaallit Amerikamiullu soqutigisaasa ataqqineqarnerat siuarsarneqarneri qulakkeertarpagut.
- Suleqatigiinnerni suniluunniit tatigeqatigiinneq ataqqeqatigiinnerlu toqqammaviupput, taamaammallu ukiut qaangiuttut ilungersunartuusimanerat isertuunneqassanngilaq. Taamaammallu killiffissiuinissaq qanorlu qanittumik iligiittut immikkoortuni ataatsimut soqutigisatsinni suleqatigiinnermik ineriartortitsisinnaanitta oqaloqatigiissutiginissaa Naalakkersuisut qilanaaraat, Vivian Motzfeldt oqarpoq.
Nunanit tamalaanit ukkatarineqartoq
Nunatta nunarsuarmi politikkikkut sammineqangaatsialerneranit ukioq ataaseq qaangiussimalerpoq. Donald Trumpip USA-mi præsidentitut januaarimi ivertinneqarnermini nunatsinnik ukkatarinnitsitseqqilerneranik pissuteqarpoq.
USA-p sillimaniarnermik pissuteqartumik nunatsinnik aqutsilernissaa pisariaqartoq Trumpip arlaleriarluni oqaatigaa.
Taassuma oqaatigisai nunatsinni akiliussutsimik aatsaat taama angitigisumik takutitsisoqarneranik kinguneqarpoq. Inuppassuit Nuummi Trumpip oqaasiinut akerliunerminnik takutitsiniarlutik marsip 14-ianni ingerlaaqatigiipput.
Trumpip nunatsinnik piserusunnini siullermik præsidentiunermini 2019-imi oqaatigeqqaarpaa.
Inuiaqatigiinnut illersornissamullu tunngasut
Joint Committeep inuiaqatigiinnut tunngasut aamma nunatta USA-llu akornanni suleqatigiinnerit suliarisarpai. Ukiumoortumik ataatsimiinnerit naalakkersuisut amerikamiullu naalakkersuisuini atorfillit akornanni ataatsimiinnerusarpoq. Tassanilu danskit naalakkersuisuini atorfilinnik aamma peqataasoqassaaq.
Permanent Committee USA-p nunatsinni sakkutooqarfeqarneranut tunngatillugu paasissutissanik paarlaasseqatigiinnerup ajornannginnerulernissaa pillugu 1991-imi pilersinneqarpoq. Tassani naalakkersuisuni, danskit naalakkersuisuini amerikamiullu naalakkersuisuinit sinniisuutitat peqataasarput. Naalakkersuisut allapput.
Nunanut allanut, sillimaniarnermut illersornissamullu politikkip nunatsinnut pingaaruteqarneranut Danmark nunarpullu peqataasartussaavoq.
