Nunarput Danmarkilu ataatsimoorlutik ikiaroornartunik anngiortumik eqqussuinermut annikillisaaniartut

Inuit ikiaroornartumik nunatsinnut anngiortumik eqqussiniartillugit tigusarineqartut tusartuarparput. Maanna ikiaroornartut nunatsinnut anngiortumik eqqussuunneqartut amerlassusiisa ikilisinneqarnissaat Danmarkip nunattalu ataatsimut angunialerpaat.

Danskit akileraartarnermut ministeriat, Jeppe Bruus aamma Akileraartarnermut Aningaasaqarnermullu Naalakkersuisoq, Erik Jensen ataatsimut tusagassiuutinut nalunaarummi allapput.

- Ikiaroornartut nunatsinnut eqqussorneqartut amerliartuinnarput. Danmarkilu aqqutigalugu pilersuisoqarajulluni, ikiaroornartumillu niuernikkut aningaasarpassuit kaaviiaartinneqartarput. Aningaasat taakku pinerlunnikkut aningaasarsianik malunnarunnaarsarneqarajuttarput, angutit marluk suliniutinik arfinilinnik nutaanik suliaqartut tusagassiuutinut nalunaarummi allapput.

Suleqatigiinneq, suleqatigiinneq suleqatigiinnerlu

2020-mit 2023-mut hashi 276 kiilu aningaasallu 12,5 millionit koruunit arsaarinnissutigineqarput.

Haship anngiortumik eqqussuunneqartup annertussusaanik appaaniarnermi nunarput Danmarkilu killeqarfiit akimorlugit suleqatigiinniarput. Tamatuma saniatigut ilisimasanik avitseqatigiinnikkut misilittakkanik paarlaasseqatigiinnerunikkut kiisalu ‘sungiusarmi ilinniarnermilu suleqatigiinnermut pitsanngorsaanikkut’ suleqatigiinniarput.

Pinerlunnikkut aningaasaqarnerup piuneerutsinnissaanut paasissutissanik paasissutissat atorniarpaat, misilittakkanik avitseqatigiinniarput teknologiilu atorlugu aaqqiissutit nutaat misissorniarlugit.

- Ikiaroornartoq inuunermut aserorterisarlunilu inuiaqatigiinnut innarliisarpoq. Ikiaroornartunillu anngiortumik eqqussuineq niueruteqarnerlu aningaasanik iluanaaruteqarfiungaatsiartarluni. Tamanna akuersaarneqarsinnaanngilluinnarpoq, sorraatsumillu pinerluuteqarlutik ikiaroornartunik Kalaallit Nunaannut eqqussiniartut unitsinneqarnissaannut sapinngisarput tamaat iliuuseqassaagut.

- Taamaammat Kalaallit Nunaata Danmarkillu akornanni suleqatigiinneq pitsanngorsarlugit pitsaanngitsumik ineriartortoqarnera unikaallatsinniarparput, danskit akileraartarnermut ministeriat, Jeppe Bruus oqarpoq.

Danskit akileraartarnermut ministeriat nunatsinnut aggustip 18-iannit 21-annut tikeraarpoq.