Namminiilivinnermi naalagaaffimmit tapiissuteqaannarnissaq ilisimatuup apeqquseraa

Danamrkimut atajunnaarluni namminiilivinneq - naalagaaffimmiit tapiissuteqaannartoq?

Tamanna pisinnaasoq nunanut allanut tunngasunut naalakkersuisoq, Naleqqameersoq, Pele Broberg isumaqarpoq.

Upernaaq apriilimi qineqqusaarnermi paragraf 37-imilu Erik Jensenimut qanittumi akissummi Pele Broberg allappoq, Kalaallit Nunaat namminiilivippat Danmark naalagaaffimmit tapiissutinik suli akiliisassasoq.

Tamassumali ilumoornissaa qularnartoq, Sermitsiaq.ag. allappoq.

AAMMA ATUARUK Asii: Aningaasatigut namminiilernissarput suli ungaseqaaq

Aviisip nunat tamalaat akunnerminni pissusiinik Danmarkimi ilisimatooq, Ulrik Pram Gad apersorpaa.

- Isumaqarpunga Danmarkip tamanna pisussaaffigineraa nalorninartorujussuusoq, taanna oqarpoq.

Taanna naapertorlugu danskit naggataani aalajangiissagunarput, Kalaallit Nunaannut atajunnaareernermi milliardilikkaanik suli akiliisarusunnersut.

Tapiissutit ukiualunnguani atorunnaariartussasut

Danmarkimi ministeriunerusimasoq, Lars Løkke Rasmussen (V) upperissagaanni naalagaaffimmiit tapiissutit nammiliilivinnermit ukiut sisamat missaasa ingerlaneranni unitsikkiartuaarneqassapput.

Taanna folketingemi 2017-imi oqallinnermi taama oqarpoq.

- Kalaallit Nunaat namminiilivereerpat naalagaaffimmiit tapiissutit sulianillu isumaginnittarneq sivisunerusumik pinissaat naatsorsuutiginngilara, taanna oqarpoq, ukiorlu 2000 innersuussutigalugu.

Savalimmiut namminiilivinneq pillugu naalagaaffillu taamani oqaloqatigiipput. Ministeriunerusimasorlu Poul Nyrup Rasmussen (S) taamani oqarpoq, naalagaaffimmiit tapiissutit ukiut sisamat sinnerlugit ingerlaneranni aallaqqaammut nungukkiartuaassasut.

Tapiissutit ukiuini 25-50-ini

Oqallinnermi tassani Lars Løkke Rasmussen oqarpoq, naalagaaffik Kalaallit nunaannut namminersulivinnikumut tapiissutinik tunniussisarnissaminik pisussaaffeqanngitsoq.

- Kalaallit Nunaata namminiilivinneq anguppagu Danmarkip aningaasatigut ilaannakortumik tamakkiisumilluunniit ikiorsiisarnissaa piumasaqaataanngilaq, taanna oqarpoq.

Naleqqap qineqqusaarutaani allassimavoq, namminiilivereernermi ukiut 25-50-illu ingerlaneranni naalagaaffimmiit tapiissutisisarnissaq partiip kissaatigigaa.

Naalagaaffimmiit tapiissutit ukiut tamaasa 3,986 milliardit koruuniusarput, taakkualu nunatta karsiata ukiumut isertitaasa 55 procenteraat.