Tamanna Illorsuarni najugaqartut nuutsinneqarsimanerat pillugu nakerisarsiunngitsumik nalunaarusiortoqarnissaanut tunngatillugu Ukiaanerani ataatsimiinnermi oqallisigineqareerpoq.  

Naleqqamiilli siunnersuut itigartinneqarpoq. 

Atassut nunaqarfiup ammaqqinneqarnissaa pillugu Inatsisartuni pingasunngornermi siunnersuuteqarpoq.  

- Alloriarnissamut ammaqqinneqarnissaanullu suliniuteqarnissaq piffissanngorpoq. Taamaattumik Naalakkersuisut aalajangersimasumik pilersaarusiortariaqarput, Atassutip siulittaasua Aqqalu C. Jerimiassen oqarpoq. 

Nunatsinni nalunaaquttap ingerlaarfigisimasaanut utertinneqarnissaa aasaaneranilu siuartinneqartarunnaarnissaa pillugu suliaq pingajussaanneerneqartussaagaluarpoq. Kinguartinneqarporli. 

Illorsuit ammaqqinneqarnissaat

Atassutip siulittaasua Illorsuit ammaqqinneqarnerat, naalakkersuisut qinigaaffimmi uani, angusatut pingaarnerpaat ilagissagaat isumaqarsimavoq.

- Innuttaasut sivisuumik utaqqipput. Nunaqarfimminnut utersinnaanissartik, najugaqavissunngornissartik innuttaasutullu allatuulli sullinneqarsinnaanissartik neriuutigaat, Aqqalu C. Jerimiassen oqarpoq. 

Naalakkersuisut Illorsuit siunissaat pillugu erseqqissaasoqarnissaata pisariaqartinneqarnera paasivaat. 

Ammaqqinnissaali suli isumannartoqartippaat. 

- Aatsitassanut Naalakkersuisoqarfimmiit nunap sisoortarnera pillugu qaammatikkaartumik nalunaarusiortarput. Nalunaarutinilu kingullerni nunap annerusumik sisoornissaanik takussutissaqanngilaq, isorliunerusunut naalakkersuisoq Iddimanngiiu Bianco (IA) oqarpoq:

- Nunalli ukiut 50-it tulliuttut ingerlaneranni sisooratarsinnaanerata ilimanaateqarneranik ataatsimut naliliinermut allanngortitsinngilaq. 

Taamaattumik Naalakkersuisut Illorsuit ammaqqinnissaannut taarsiullugu, isumannaallisaanikkut suliniutinik pilersaarusiortoqarnissaa siunnersuutigaat.  

Siunnersuut Sanaartornermut Ataatsimiititaliamut suliassanngortinneqareerpoq. 

Nunatsinniit tunisassiortut poortuutinut akitsuutinik akiliisarunnaarsinnaanerat Inatsisartuni pingasunngornermi aamma oqallisigineqarpoq. Siunnersuutilli suliarineqarnissaanut, nunatta nunarsuarmi niueqatigiinnermut kattuffimmut ilaasortanngornissaa sunillu pisussaaffeqartitsinissaa utaqqimaarneqartariaqarpoq.