Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik Naalagaaffiullu sinniisoqarfia, inatsisitigut ataataqanngitsut ikiorneqarnissaannut neqeroorutit nutaat, qaammatip matuma aallartinnerani atuutilersut, pillugit paasissutissiiartorlutik nuna tamakkerlugu maannakkut angalapput.  

Nunatsinni meeqqat katisimanngitsumik anaanaqarlutik inunngortut - katisimanatillu anaananngortut - kinguaariinni naligiimmik siornatigut pisinnaatitaaffeqartitaanngillat. Meeqqanummi katisimanerup avataani nunatsinni inunngortunut, ataatassarsiuussinissaq, nuna tamakkerlugu inatsisip 1974-imi allanngortinneqarnissaata tungaanut siornatigut piumasaqaataanngilaq.  

Tamanna maanna akisussaaffigineqartariaqartoq Meeqqanut, Inuusuttunut, Ilaqutariinnut Nunamullu Namminermut Naalakkersuisoq Nivi Olsen (D) isumaqarpoq.

- Eqqunngitsuliornerit inuiaqatigiittut paasineqarnissaat, siornatigullu kukkussutaasut aaqqinneqarnissaat akisussaaffigissallugu uannut pingaaruteqarpoq. Oqaluttuarisaanermi pisimasut allanngortitsisinnaanngilagut, kisianni nassuerutigisinnaavagut, tunuliaqutartillu pillugu paasisaqarnissaminnik ikiorneqarumasut namminnerlu oqaluttuassaminnik pilersitsiniartut ikiorsinnaavagut, taanna KNR-imut allakkatigut akissuteqarluni oqarpoq.

Eqqugaasut akuliunneqartut

Naalakkersuisoqarfik Kalaallit Nunaanni Naalagaaffiup Sinniisoqarfia aamma Danmarkimi Isumaginninnermut Ineqarnermullu Ministereqarfik suleqatigalugit inatsisitigut ataataqanngitsunut suliniutinik nutaanik aallartitsinerat, soorlu ataatassarsiornermi suliamik aallartitsinissamut taperserneqarsinnaaleqqinneqarnerat oqaloqatiginnissinnaanerallu tusarliunneqarmalli sapaatip-akunnera ataaseq qaangiuppoq.

Oqarasuaatikkut attaveqartarfissaq nutaaq Kalaallit Nunaanniit Danmarkimiillu akeqanngitsumik sianerfigineqarsinnaavoq, oqaloqatiginninnissamik neqeroorut inatsisitigullu siunnersuinerit internetikkut pissarsiarineqarsinnaassallutik. Naalakkersuisoqarfik taama ilisimatitsivoq.

Inatsisitigut ataataqanngitsut ikiorniarlugit suliniutit arlallit 2019-imi aallartinneqarput. Inuilli eqimattat eqqugaasut, neriorsuutigineqartutut ikiorneqarsimannginnamik, KNR-ikkut kingorna sakkortuumik isornartorsiuipput.

Tamannali inatsisitigut ataataqanngitsut arlallit suliamut akuliutsinneqarnerata kingunerisaanik maanna pinngitsoortinneqarsinnaavoq, Nivi Olsen oqarpoq.

Oqartussaasut innuttaasullu qanimut naapitsineratigut siunnersuutillu tamaasa ataatsimut katersornerisigut tamanna ilaatigut pissaaq.