Assit takukkit: Naalakkersuisoqatigiilernissamut atsioqatigiittoqarnera qullilinermik, nuannaarnermik nipilersornermillu ilaqartoq

Naalakkersuisoqatigiinnissamut isumaqatigiissut oqaluttuarisaanermi pingaaruteqartoq nutaaq ullumi atsioqatigiissutigineqarpoq, Naalakkersuisullu siammasissut partiit tamangajammik Naleraq minillugu peqataaffigisaat Inatsisartunit akuerineqarnissamut maanna piareerput.

Atsioqatigiinneq Nuummi Katuami inersuaaqqami nunarsuarmit tamarmit assiliissutit partiit siulittaasuinut sammineranni kalaallillu innuttaasut aamma ataatsimoorneranni pivoq.

Oqalugiarnerit aallartinnginneranni inuittut erinarsuut erinarsoqatigiinnit atorneqarpoq, naalakkersuisunngortussallu saqqummiunneqarnerat naammassimmat Juaaka Lyberth nipilersoqatigisartakkani peqatigalugit taallamik naggasiipput, tassanilu inuinnaat politikertillu nipilersuutip nipaa malillugu issiavimminnit qitaasarput.