Múte B. Egedep spiralilersuisoqarsimanera pillugu Nunatta Karsiata aningaasarliorneranut atassuseraa – Danmark akisussaaffimmik naammassinnissaaq

Danmark nunatsinni aningaasaqarnermut akisussaaffimmik tigusinerussaaq.

Aningaasanut akileraartarnermullu naalakkersuisoq, Múte B. Egede (IA) aningaasanut inatsisissatut siunnersuummik marlunngornermi ullaap tungaani saqqummiinermini oqarpoq.

Taassuma nunatta aningaasaqarnikkut ilungersuanera spiralilersuisoqarnera pillugu suliamut atassuserpaa. Naatsumik oqaatigalugu Nunatta Karsia ukiuni tulliuttorpassuarni millionerpassuarnik amigartooruteqassaaq, tamannali pingaarnertut soraarnerussutisiaqalersut amerlisussaanerannik, ikinnerusut sulisinnaalernerannik innuttaasullu amerlassusaata ikilinerannik pissuteqarneruvoq.

Spiralilersuineq innuttaasut amerlassusaanut pissutaasutut politikerit akornanni oqaatigineqarajuppoq. Imaanngilarli tamanna pissutaasoq.

Naak spiralilersuisoqarnerani kalaallit inuiaqatigiit amerliartornerannut ikilisaanissaq siunertarineqarsimagaluartoq kalaallit Danmarkimut nuuttartut naartuersissinnaatitaanerlu innuttaasut amerlannginnerannut pingaartumik pissutaasoq Nunatsinni Naatsorsueqqissaartarfiup oqaatigigaa, KNR-ip 2022-mi ilanngutassiaraa.

Múte B. Egedelli innuttaasut ikiliartornerannut Naatsorsueqqissaartarfiup pissutaaneragaa isumaqatiginngilaa.

- Pissutsit uku nutaajunngillat, danskilli spiralilersuinerata inerneraa. Pissutsit maannakkut takusinnaasagut nunasiaateqartut iliuusaata inernerigaat oqaatigissallugu pingaaruteqarpoq.

Qanorluunniit pisoqarsimagaluarpat danskit naalagaaffiat spiralilersuisoqarneranut akisussaaffimmik tigusinerusariaqartoq kalaallillu inuiaqatigiivinut aningaasanik amerlanerusunik tapiissuteqartariaqartoq naalakkersuisoq isumaqarpoq.

Naalagaaffimmit tapiissutaanngitsut – kisianni aningaasat amerlanerusut

Naak politikerit aaqqissuusseqqinnernik immikkut ilisimasallit siunnersuuteqarneratulli atuutsitsileraluarunik Nunatta karsia 2032-mit 2045-mut suli amigaateqassasoq, KNR-ip allaaserinikuuaa.

Tamatumalu kingorna aningaasaqarnermut naalakkersuisuusimasup, Palle Christiansenip Danmarkimut qinnuiginnilluni naalagaaffimmit tapiissutinik qaffaaqqusinissaq imaluunniit ingerlatsinermut nalinginnaasumut atorneqartussaanngitsunik immikkut tunniussisoqarnissaa neriunnersuutiginikuuaa.

Danmarkimit aningaasanik amerlanerusunik soorlu naalagaaffimmit tapiissutinik qaffasinnerusunik noqqaassuteqarniarpit?

- Takornariaqarnermit aatsitassarsiornermiillu isertitaqarnerusariaqarlutalu inuussutissarsiornermik taakkulu iluanni sinaakkutinik ineriartortitsisariaqarpugut. Aappaattut, naalagaaffik pisussaaffimminik naammassinninnissamut iliuuseqarnerusariaqarpoq, Múte B. Egede oqarpoq, nangillunilu:

- Inuiaqatigiit tunngaviisa kisitsisaat qiviarutsigit amerliartornermi appariangaatsiartoqarsimasoq nassuerutigisariaqarparput. Danskit naalagaaffiata akisussaaffik tigusariaqarpa.

Naalagaaffimmit tapiissutit qaffannissaat ajunngitsuua imaluunniit ajortuua?

- Danskit naalagaaffiata tapiissutai tunngaviusumik ajortuusoraakka, pissutigalugu pinngitsuuisinnaajunnaarsitsisarmata. Taamaammat ingerlatsinermut nakkaannartussaanngitsunik suliaqaqqinnissatsinnut aaqqiissutaasariaqarpoq, naalakkersuisoq nassuiaavoq, nangillunilu:

- Taamaammat naalagaaffimmit tapiissutit qaffanneqassanngillat, kisianni sinaakkutit pitsaanerulersinneqassapput. Iliuuseqartoqassaguni taama isumalluutinik pitsaanerusunik uagutsinnut tunniussisoqassaaq siunissamullu pituttorneqarnata.