Múte B. Egedep innuttaasut nassuiaatissaqarfigigai
- Piffissami kingullermi pisut tamatsinnut sunniipput, uannullu attaveqartartorpassuit ilaat ernumallutillu toqqissisimannginnerat paasilluarsinnaavara. Qanorluunniit tatineqartigigaluaruttaluunniit, uiverata inuiattut ataatsimoornitsigut takutissavarput - Kalaallit Nunaat kalaallit pigigaat.
Naalakkersuisut siulittaasuat, Múte B. Egede (IA) facebookomi quppernermini taama allappoq. Trumpip nunatta aqussinnaalernissaanik oqariartuuteqarneranik nunatsinni toqqissisimanngitsunut taama oqariartuuteqarluni allppoq.
Taamatullu eqqissisaaneq naammanngitsoq, namminersornerullutik namminersorlutillu oqartussani ukiorapassuarni atorfilittaasimasoq, Kaj Kleist taama isumaqarpoq.
- Imatut oqartariaqarpunga taakku sapaatit akunneri pingasut missaanni taamatut oqariartortuarpoq qanoq ittuunersugut, kalaaliuvugut aammattaarlu eqqissisimasumik tamatta ingerlassasugut, taakku sapaatit akunneri pingasut ingerlanerini takusinnaavarput pissutsit allanngoriartuaartut taamaallillutik aamma apeqqutit nutaat ilai akisariaqartutut isumaqarnartut, naalakkersuisut siulittaasuaniit imaluunniit naalakkersuisuniit.
Nunatsinni naalakkersuisut ersarissuliornissaat, nunatsinni kommunit kattuffigisimasaanni KANUKOKA-mi ukiunik arlalinnik pisortaasimasup, Martha Labansenip aamma amigaatigaa.
- Isumaqarpunga inuiaqatigiit innuttaasut oqartussaaqataaneranik ingerlatsisut, aammalu naalakkersuisuisa pisussaaffigivaat erseqqissumik ammasumillu oqallittarnissat. Tassami qinersisinnaanngilagut qinigassagut iluamik nassuiaanngippata qanoq sumullu aqutsiniarnerlutik. Aqutsisussatut imminut piukkukkunik taava aamma oqaluuserisariaqarpaat takorluukkat suunuku piginerlugit, inuiaqatigiit sumut ingerlassappat, innuttaasut sumut ingerlassappat, taanna oqarpoq.
Naalakkersuisut ersarinnerusariaqarput
Múte B. Egede innuttaasunut tusagassiortunik katersortitsinikkut kiisalu inuit attaveqaqatigiittarfiatigut maannamut kisimik oqaaseqarnikuuvoq.
Tamatigullu ima oqariartuuteqartarpoq “Nunarput tuniniagaanngilaq, suleqatiginnissinnaavorli” imaluunniit “Uagut Kalaallit qallunaajorusunngilagut, aamma Amerikamioorusunngilagut. Kalaaliuvugut”.
Innuttaasunut attaveqarnera ajunngilluinnartoq, Inuit Ataqatigiinni pilersitseqataasoq, Aqqalu Lynge isumaqarpoq. Nunarput aatsaat taama ilungersunartigisumi inisseqqanerani nunatta siuttua aatsaat taama aalajangiusimatigisoq, taanna isumaqarpoq. Nunarput Aqqaluk Lynge oqarnera naapertorlugu annaarataannaavarput. Tamannalu naalakkersuisut siulittaasuatat isumagilluaraa, taassuma nalilerpaa.
- Isumaqarpunga naalakkersuisutta siulittaasuat Múte B. Egede ajunngilluinnartumik una suliaq suliarisimagaa, taanna oqarpoq.
Nalakkersuisut nunatta inissisimanera immikkut ittuusoq, Kaj Kleistip Martha Labansenillu takusinnaavaat. Taamaammallu nunatsinni siuttut akisussaaffimmik tigusillutik sumullu ingerlanisatsinnut takutitsisariaqarnerat aalajangiisuussasoq, taakku isumaqarput.
- Naalakkersuisut ulloq manna tikillugu oqarsimanngimmata suna aqqutigalugu, suut aqqutigalugit ingerlariaqqinnissatsinnut tunngavigissavagut. Taava tassa ajornakusoorpoq oqaatigissallugu naalakkersuisut ilumut suliassatik eqqortumik ingerlanneraat, imaanngitsoq kukkusoqarmat kisiannili oqaaseqannginnerminnik pissutsit ajorsiartuaartutut isikkullit innuttaasut akornanni oqallinnerit sakkortusiartortut tamakkua isiginngitsuusaarlugit naalakkersuisut pissappata ajornakusoortorujuuvoq qineqqusaalernermi taakkua saniooqutiinnarlugit ingerlassalluni, Kaj Kleist oqarpoq.
Ataatsimoorneq quppasserartoq
Politikkeritoqqat Múte B. Egedep iliuusaanut isumaqatigiinngikkaluaqalutik, naalakkersuisoqatigiinnerulli killiffiata ilungersunartumiinnerat isumaqatigiissutigeqaat.
Tassani Kuno Fencker (Siumut) isiginiarpaat, taassuma USA-mi politikerit nuimasut republikanerit partiianeersut ataatsimeeqatiginninnera. Nunarput USA-mut atalernissaa innuttaasut nipituumik oqariartuuteqarlutik isummernerat uani pineqarpoq.
- Isumaqatigiilluta ingerlanissaq aamma kaammattuutigivaa kisiannili maannakkut takoreerparput partiit iluminni isumaqatigiinnatik aallartereersut, aamma Inatsisartunut ilaasortaq Washingtoniliareerpoq tamakku tamaasa sipporlugit. Allaanngilaq nunatta naalakkersuisuininngaanniit ilaasortaq Washingonimut aallartoq ikiuukkiartorlunilu nunatta USA-mut atalernissaanut, Kaj Kleist oqarpoq.
Inuit Ataqatigiit sinnerlugit 1983-imiit 1995 ilanngullugu Inatsisartuni ilaasortaasimasoq, Aqqaluk Lynge, Kuno Fenckerimut sakkortuumik isornartorsiuivoq.
- Naalakkersuisut ataatsimoornissatsinnik oqariartuuteqarnerannik Washingtonimi iliuuserineqartut takusagut tassaapput inuit 300-t oqaliqatigineqartut. Tamanna naleqqutinngilaq, taanna oqarpoq.
