Mette Frederiksenip ataatsimiinneq pingaarutilik qisuariarfigigaa: - Ajornanngitsuinnaanngilaq
Danmarkimi ministeriuneq Mette Frederiksen (Socialdemokratiet) Kalaallit Nunaata, Danmarkip USA-llu Washingtonimi pingasunngormat ataatsimiinnerannut oqaluttuarisaanermut pingaaruteqartumut maanna qisuariarpoq.
Ippassaq ataatsimeeqatigiinneq pillugu Danmarkimi nunanut allanut ministerimit Lars Løkke Rasmussenimit aamma nunanut allanut tunngasunut naalakkersuisumit Vivian Motzfeldtimit (S) paasissutissinneqareerluni, taama oqarpoq.
- Ataatsimiinneq ajornaatsuinnaanngilaq, ministerillu taakku marluk Kunngeqarfiup isumaanik ersarissumik saqqummiussisimanerannut Amerikamiullu oqaaseqaataannik itigartitsisimanerannut qujaffigerusuppakka. Taamaaliornerat pingaaruteqarpoq, Mette Frederiksen tusagassiuutikkut nalunaarummi taama oqarpoq.
Amerikamiut præsidentiata Donald Trumpip Kalaallit Nunaannik tiguaanissaminik kissaateqarnini arlaleriarluni oqaatigereeraalu, illuatungeriit taakkua pingasut siullermeerlutik iluamik ataatsimeeqatigiipput.
Takorluukkat piviusunngornissaat pinngitsoortinniaraat
Ataatsimiinneq præsidentip Kalaallit Nunaata USA-mut ilaanissaanik kissaateqarneranut allannguinngilaq, nunanut allanut ministeri Lars Løkke Rasmussen tusagassiortunik katersortitsinermi oqarpoq.
- Suli ilungersunarpoq, taamaattumik tamatuma piviusunngornissaa pinngitsoortinniarlugu iliuuseqartuarpugut, ministeriuneq oqarpoq.
Ataatsimiinnerup kingorna suleqatigiissitaliortoqarpoq, tassani diplomatit nuimasut USA-p isumannaallisaanermut tunngatillugu kissaatai qanoq iliornikkut nunatta killeqarfiinik imaluunniit Kalaallit Nunaata nammineersinnaaneranik unioqqutitsinertaqanngitsumik naammassineqarsinnaanersut misissussavaat.
Najuunnissaq aalajangiisuussasoq
Danmarkip Natomilu nunat arlallit sakkutuui Kalaallit Nunaannut pingasunngornermi aallarteriikatappaat.
- Issittumi sakkulersornerup sakkulersorneqarnerunissaa Europap Amerikallu avannarliup isumannaatsuunissaannut pingaaruteqartoq, NATO-mi isumaqatigiissutigineqarpoq. Danmark Issittumi piginnaasanut malunnaatilimmik aningaasaliivoq.
- NATO-mi ilaasortat arlallit Kalaallit Nunaanni eqqaanilu ataatsimut sungiusarnermut ulluni makkunani peqataasut aamma uppernarsarsinnaavara. Kalaallit Nunaata illersorneqarnissaa sernissornissaalu NATO-mi ilaasortanut tamanut akisussaaffiuvoq, Mette Frederiksen nangilluni oqarpoq.
Danskit naalakkersuisuisa Folketingimi partiit siulittaasui aamma Atlantikup avannaani Folketingimut ilaasortat, ministeriunerup allaffiani tallimanngorpat ataatsimiinnissami, pissutsit pillugit ilisimatinniarpaat.
