Kommunimi politikerit aalajangiusimasut: Nuuk nutaamik ilisarnaatitaassaaq

Kommuneqarfik Sermersuup illoqarfiit pingaarnersaanni nutaamik ilisarnaatitaarnissamik kissaateqarnera Nuummiorpassuarnit nuannaarutigineqanngilaq.

Innuttaasummi 282-it suliniut kommunimut 5 millionit koruuninik akeqartussaq unitsinniarlugu atsioqataapput.

Innuttaasoq Per Stockholm suliniutigineqartup unitsinneqarnissaanik siunnersuuteqareersorlu, suliaq kommunalbestyrelsimi pingasunngornermi ualikkut oqaluuserineqaqqippoq. Siunnersuulli amerlanerussuteqartunit akuerineqanngilaq, taamaattumillu aalajangiineq allanngortinneqanngilaq: Nuuk nutaamik ilisarnaateqalissaaq.

Inuit Ataqatigiit, Demokraatit Nalerarlu amerlanerussuteqarlutik pilersaarutip ingerlatiinnarneqarnissaa tapersersorpaat. Siumut partiit akornanni kisiartaalluni pilersaarutinut akerliulluni taasisuuvoq.

Sermitsiap illoqarfiup ilisarnaataatut taarserneqarnissaa pineqanngitsoq, borgmester Avaaraq Olsenip, IA-meersup, suliap oqaluuserineqarnerani erseqqissaatigaa.

- Nutaamik ilisarnaateqalernissaq pineqanngilaq, illoqarfimmili kusanarnerulersitsinissaq pineqarpoq, borgmesteri oqarpoq.

Suliniut “Sermitsiap Qilaataa”-mik taaguuteqarpoq, illussanillu titartaasartumit Bilo Høegh Stigsensenimit titartarneqarluni. Qilaat eqqaassutissaliornissamut isumassarsiorfigineqarpoq, eqqaassutissallu Kangillinnguit avannaata tungaanni Sermitsiamut isikkiveqartumi inissinneqarnissaa pilersaarutaavoq.

Kommunalbestyrelsep 5 millionit koruunit suliniummut atugassatut immikkoortippai. Unammisitsinermi aaqqissuussinermut allattorsimaffik naapertorlugu, unammisitsinermi akissarsiassat katillugit 250.000 koruuniupput, ajugaasup akissarsiassai ikinnerpaamik 100.000 koruuniullutik.

Innuttaasut taperseraat

Aalajangernerli innuttaasunit arlalinnit isornartorsiorneqarpoq. Aningaasat inissiat aserfallassimasut iluarsaannissaannut illoqarfimmiluunniit suliassanut allanut nukinginnartunut atorneqartariaqarsimannginnersut ilaasa apeqquserpaat. Allalli innuttaasunik taasititsinermi taaseqataasut ikinnerat tikkuarpaat, taamaattumillu suliniutip innuttaasunit taperserneqarnera naammannginnerarlugu. 

Suliniutip unitsinneqarnissaanik innuttaasunit siunnersuut Siumumit taperserneqarpoq.

- Uagut innuttaasut suliniummik unitsitsinissamik siunnersuuteqarnerat taperserpagut. Sermitsiarmi ilisarnaatigaarput, Martha Abelsen oqarpoq ilassutigalugulu:

- Facebookikkut oqallinneq pineqanngilaq, innuttaasulli akerliliinissaminnut periarfissaminnik atuisimanerat pineqarluni. Aalajangiineq isumaqataaffiginngilaat innuttaasullu taperserpagut, Martha Abelsen oqarpoq.