Isumaqatigiissutip nutaap kalaallit ukiuunerani unammiuaartoqarnerani 2029-mi peqataanissaat qulakkiissagaa
Schweizimiittumi Graubündenimi ukiuunerani unammiuaartitsinissamut, erseqqissumik aaqqissuussamillu suleqatigiinnissaq isumaqatigiissutip qulakkiissavaa. Peqataasussat amerlassusissaannut qinnuteqarnerni toqqaanernilu suliaqarnermi suleqatigiilluarnissamik pilersitsinissaq anguniagaavoq – taavalu naalagaaffeqatigiinni inuit innarluutillit timersortartut ineriartortinneqarnissaannut pitsanngorsaanissaq, Parasport Danmark tusagassiuutinut nalunaarummi ilisimatitsivoq.
Isumaqatigiissut oqaluttuarisaanermi alloriarnertut, Kalaallit Nunaanni Timersortartut Kattuffianni siulittaasup Claus Nielsenip taavaa.
- Parasport Danmarkimik suleqateqarneq Kalaallit Nunaanni Timersoqatigiit Kattuffiannut pisumik pingaarutilimmik nalunaaqutsiivoq. Timersornermi ataatsimoornermik ingerlalluartumik peqataatitsisumillu anguniakkatsinnut qanillattuutaavoq, kikkut tamarmik – pisinnaasaq apeqqutaatinnagu – timersorneq aqqutigalugu peqataanissamut, ineriartornissamut nuannaarnissamullu pisinnaatitaassallutik, taanna oqarpoq.
Ukiuunerani unammiuaarnerni 2025-mi kalaallit angusaat uppernarsaasiullugit, ataatsimoorneq tapersersuinerlu qanoq kinguneqarsinnaanersut aamma oqaatigai.
- Isumaqatigiissummik taassuminnga, inuit innarluutillit timersortartut timersornikkut inooqataanikkullu pitsanngorsaanermut tunngavigissaarluartumik peqalissaagut. Unamminerit kisimik pineqanngillat, aammali inuunermi naleqartitat, ataqatigiinneq kikkunnullu tamanut inissaqartitsiuarnermik qulakkeerineq, Claus Nielsen oqarpoq.
Naalagaaffeqatigiinnermi suleqatigiinnerulerneq
Isumaqatigiissut Parasport Danmarkimittaaq nuannaartitsivoq.
Suleqatigiinneq naalagaaffeqatigiinnermi inunnut innarluutilinnut timersortartunut ineriartortitsinissamik, ataatsimut akisussaaffeqarnermik takutitsingaatsiartuusoq, siulittaasoq John Petersson oqarpoq.
- Special Olympics World Winter Games Switzerland 2029 eqqarsaatigalugu, danskit kalaallillu timersortartuinik pisinnaasaqarnerulertitsitsisinnaanissarput kissaatigaarput. Isumaqatigiissut peqataasussat amerlassusissaannut qinnuteqarnerni toqqaanernilu suleqatigiilluartoqarnissaanik qulakkeerinnittuussaaq – Special Olympicsillu takutitsineratut, ataatsimooqatigiilluartoqarneranik tunngavilersuutaassaaq, taanna oqarpoq.
Isumaqatigiissummi timersortartut kakkannerit kisimik pineqanngitsut suleqatigiit erseqqissaapput, kisianni aamma Nunatsinni Danmarkimilu inunnut ineriartornikkut innarluutilinnut attaveqaatinik, tunngavinnik toqqissisimanartunik peqataanissamullu periarfissanik pitsanngorsaanissaq pineqarpoq.
Isumaqatigiissummik Parasport Danmark danskit peqataasussat amerlassusissaannut qinnuteqarnerit ataqatigiissarisuussapput, timersortartunillu toqqaanissamut akisussaaffik inaarutaasoq tigummissavaa.
Kalaallit timersortartut nalilersorneqassapput, timersuutinilu pineqartuni danskit naligalugit toqqarneqarsinnaassapput. Taamaalillutik danskit ilaattut 2029-mi unammiuaaqattaarnernut peqataassapput.
