Ilungersunarlunilu ernumanarpoq: Kommuni ukiup aallartinneranut missingersuutiinit 18 millionit koruuninik atuinerusoq

Kommune Qeqertalik aatsaat taama ilungersunartigisumik aningaasatigut tatineqarpoq.

Kommunalbestyrelsimi illuatungiliuttut Siumup gruppiani siulittaasoq oqarpoq.

Ukiup qaammataanni siullerni pingasuni Kommune Qeqertalik 18,1 millionit koruuninik aningaasatigut atuivallaarsimasoq, taassuma nassuiaatigaa.

- Taama ingerlatsineq ingerlaannassappat ukiup naanerani minnerpaamik 72 millionit sinnerlugit sippuisoqartussaanera aarlerinarpoq, Aqqa Samuelsenoqarpoq.

Taassuma oqarnera naapertorlugu ingerlatsivinni tamani ukiup aallartinnerani atuivallaartoqarsimavoq.

- Ilungersunartuuvoq, aammalu aningaasatigut inissisimanerput ernumanarpoq, taanna oqarpoq.

Kommune Qeqertalimmi Demokraatit, Inuit Ataqatigiit aamma Naleraq siuttuupput.

Misissuilluarfiusariaqartut

Kommunip aningaasatigut atuivallaareernera tamatumalu aaqqiiffigineqarnissaanut atatillugu qanoq iliuuseqartoqarnera pillugit  nassuiaasoqarnissaa Siumup gruppiata kissaatigaa.

- Taakua 18. millionit atuivallaarutaasut sukumiisumik nassuiarneqartariaqarput. Taavalu aamma naatsorsuutit taama ilungersunartumik killinnerat qanoq pinngitsoorteriarnissaanut iluusissatut pilersaarummik saqqummiussisoqartariaqarpoq, Aqqa Samuelsen oqarpoq.

Kommune Qeqertalimmi aningaasanik aqutsinerup ajornartorsiutaanerata kinguneranik innuttaasunik sullissineq aarlerinartorsiortinneqartoq, sanaartugassatullu pilersaarutit eqqugaasinnaasut taanna isumaqarpoq. 

Borgmesterillu, Simigaq Heilmannip (D) iliuuseqartariaqarnera kaammattuutigalugu:

- Tassa borgmesteri Simigaq Heilmann kommunalbestyrelsimi suleqatigiiuppata aamma illuatungiliuttuuppata aningaasanik sukumiisumik, taavalu aamma aningaasanik aqutsilluarnissamut partiit tamaasa peqatiserisariaqarpai, Aqqa Samuelsen oqarpoq.

Missingersuutit pillugit ataatsimiinneq

Siumup Kommune Qeqertalimmi amerlanerussuteqarnerani kommunimut siorna qinersinermi annaavaa. Partiilu kommunimi politikkikkut allaffissornikkullu allanngutit pillugit isumaqatigiinngitsoqarnera kommunimi suleqatigiinniilernerani.

Partiilli kommunimi partiit suleqatigiittut aaqqiissutissarseqatigiinnissaat neriuutigaa:

- Ullut makkua kommunalbestyrelsi missingersuutit pillugit ataatsimiittussaavoq, Aqqa Samuelsen oqarpoq, nangillunilu:

- Tassanilu aamma siunissaq isigalugu aaqqiissutaasinnaasunik ujartueqatigiinnissatsinuit uagut Siumumiit qilanaarpugut, suleqataasaagullu.

KNR-ip borgmesteri Simigaq Heilmann Siumup Kommune Qeqertalimmut tunngatillugu ernumassuteqarnera pillugu oqaaseqartinniarsaraa, oqaaseqartinnissaali iluatsinngilaq.