Kangaatsiami atuarfik nutaaq ammaanersiorneqarmat: - Sinnattoq piviusunngorpoq
Kangaatsiami sivitsulersumik qilanaarineqarsimasoq kiisami pingornermi aggustip qulingani persuarsiutigineqarpoq.
Kangaatsiamimi atuarfik nutaavissuaq atoqqaarfissiorneqarpoq.
Sinnattoq piviusunngortoq
- Sinnattoq piviusunngorpoq, Kommune Qeqertalimmi borgmesteri Ane Hansen Kangaatsiami atuarfittaap atoqqaarfissiorneqarnerani ilaatigut oqarpoq.
Kangaatsiami atuarfittaami atualertussat 75-it missaaniipput, taakkulu atualernissaminnik qilanaarsimaqaat.
AAMMA ATUARUK Kangaatsiaq: Atuartut atuarfittaassartik qilanaarigaat
Taamaammat Kevin Lundblad Iversenip nutaamik atuarfittaarunik aamma neriuutigaa aalaakkaanerusumik ilinniartitsisoqalerumaarlutik.
- Neriuppunga ilinniartitsisut sungiusimanerusagut nikerassanngitsut, Kevin Lundblad Iversen, siorna septembarip tallimaani KNR-imit apersorneqarluni oqarpoq.
Oquk ilinniartitsisunit qimagarneqartoq
Atuarfitoqqap oqoqarnera pissutigalugu ilinniartitsisut arlaqartut atorfitsik qimagarnikuugaat, atuarfiup pisortaata Sussi Adelholmip ammaanersiornermi aamma eqqaavaa.
Assi: Kommuni Qeqertalik
- Suliffissatut ornigineqarpallaartanngilaq. Ilinniartitsissutigut taarseraaffiulaartorujuuvoq, ilaatigut atorfinittut sapertaramikku, peqqissusertillu illersorusullugu suliffigiinnarsinnaanagu, Sussi Adelholm oqarpoq.
AAMMA ATUARUK Kangaatsiami atuarfittaassaq napparnersiorneqartoq
Atuarfik juunimi piareertussatut pilersaarutaasimagaluartoq, assigiinngitsunik peqquteqartumik sanaartorneqarnera qaammatit aappaa avillugu kinguaattoorpoq. Naak atuarfiup ilaa suli piariivinngikkaluartoq, pilersaarutit malillugit aggustip 17-iani atualersinnaalerput.
Atuarfittaap atissaanik kingusinnerusukkut unammisitsisoqarumaartoq, atuarfiup pisortaata aamma ilisimatitsissutigaa.
Kangaatsiami atuarfiup oqoqarnera peqqutaalluni 2018-imi angajoqqaaq akerliussutsimik takutitsipput.
Taassumalu kingorna atuarfik matuneqarpoq, nunaqarfimmilu sumiiffinni assigiinngitsunik atuartitsinerit ingerlanneqartarsimallutik.
Maannali atuarfik nutaarsuaq tassa piareerneqarpoq.
Atuarfiup nutaap aaqqissuunneqarnissaa Namminersorlutik Oqartussanit isumagineqarpoq. Kangaatsiami atuarfik nutaaq katillugu 65 million koruuninik akeqassaaq. Kommune Qeqertalik aningaasaliisuusoq Namminersorlutik Oqartussat 13,4 million koruuninik tapiissuteqarpoq.