Kalaallit Nunaannut tunngasuni ataatsimiititaliamiittut Canadamut paasisassarsioriartussasut

Folketingip Kalaallit Nunaannut tunngasuni ataatsimiititaliaani ilaasortat, Canadap inoqqaavisa Canadallu sinneraniittut, saammaateqatigiinnissamut suliaat paasisassarsiorfigiartorlugu Canadamukassapput.

Ataatsimiititaliap siulittaasua, Aaja Chemnitz, taama paasissutissiivoq.

- Canadami inuit meerartaasa angerlarsimaffiup avataanut inissinneqarnerannut suliani misilittakkat paasissutissarsiorfiginissaat saammaateqatigiinnissamullu politikkikkut suliat ilikkagaqarfiginissaat Canadamiinnitsinni ukkatarissavagut, Aaja Chemnitz oqarpoq.

Ataatsimiititaliamut ilaasortat Iqalunnut Ottawamullu politikerinik naggueqatigiillu Inuit kattuffiinik naapitaqariartussapput.

Kalaallit Nunaannut tunngasuni ataatsimiititaliaq ukiumoortumik angalasarpoq, ilaasortallu suliat piffissami angalaffiusussani pingaarutillit pitsaanerusumik qanoq suliarineqarsinnaanerinut isumassarsioriartortarlutik.

Tassalu ukioq manna ilaatigut nunap inoqqaavisa naalagaaffiillu saammaateqatigiinnissaat pillugu paasisassarsioriarnissartik toqqarpaat.

- Kalaallit Nunaannut tunngasuni ataatsimiititaliamut ilaasortat angalanermut peqataanissaminnut soqutiginnittorujussuupput, qilanaarpugullu, Aaja Chemnitz oqarpoq.

Sisimiuni periarfissat

Ataatsimiititaliamut ilaasortat aamma nunatsinnukassapput. Ilaasortat nunatsinniikkaangamik Nuup saniatigut illoqarfinnut allanut angalasartut Aaja Chemnitzip nassuiaatigaa, maannalu Sisimiunukassapput.

- Kangerlussuup mittarfittut atorunnaarnerata kommunimut kingunerluutai tusaaniarlugit Sisimiunilu ineriartortitsinissamut periarfissat, soorlu aqqusinniornissaq sumiiffiullu illersornissaqarfimmut pingaarutaa tusaaniarlugit Sisimiuniissaagut, ataatsimiititaliamut siulittaasoq oqarpoq.

Kalaallit Nunaannut tunngasuni ataatsimiititaliamut ilaasortat aggustip ulluisa qulingiluaanniit aggustip ulluisa 17-iannut angalanissaat pilersaarutaavoq.