Immikkut ilisimasalik: Kalaallisut atuarsinnaaneq allassinnaanerlu atuartut nukarliit pingaarnertut ilikkagassaraat

Ilinniartitaanermut naalakkersuisup Nivi Olsenip meeqqanut atuartunut nukarlernut atuartitsissutit ikilisikkusuppai, 'oqaatsitsinnik allassinnaanerup atuarsinnaanerullu nukittorsarnissaat kissaatigalutigu'.

Nunatsinni Ilinniartitaanermut Siunnersuisoqatigiit siulittaasuata Mitdlarak Lennertip tamanna taperserpaa. Atuartut nukarlerniinnerminni akullernut nuunnginnerminni atuarsinnaaneq allassinnaanerlu pingaaarnertut ilikkagassarigaat aamma erseqqissaatigaa.

– Nukarlerni tunngaviusumik ilikkagassat pingaarnertut ilikkartariaqarpaat, taava akullernut ikaarsaarnermi fagit amerlatsikkiartorsinnaapput, piumasaqaatillu alliartorlutik. Nukarlerni tunngaviusumik ilikkagassat, soorlu atuarsinnaaneq allassinnaanerlu, taakkua pingaarnertut sammineqartarnissaat innersuussuutiginarsinnaavoq, Mitdlarak Lennert oqarpoq.

Kalaallit Nunaanni meeqqat atuarfianni nukarlernut atuartitsissutigineqartartut 13-iupput. Taakkulu amerlavallaartut Nivi Olsen isumaqarpoq. Tamannalu allanngortikkusuppaa. Mitdlarak Lennert isumaqataavoq nassuiaallunilu.

Atuartut ilikkariartorsinnaassusaannut akornutaavoq

Atuartitsissutit amerlavallaarmata, atuartut ullup atuarfiusup ingerlanerani arlalinnik sammisassaqartarput. Tamanna atuartut nukarliit ilikkariartorsinnaassusaannut akornutaasoq, Mitdlarak Lennert isumaqarpoq. Meeqqat nukarliit atuartitsissutit ikinnerusut sivisunerusumik sammisinnaalerunikkit ilikkarluarsinaanerulissasut immikkut ilisimasalik isumaqarpoq.

- Massakkut meeqqat nukarliit ullormut nikeraqattaartarput, fagimiit fagimut nikittaqattaarlutik. Taakkua ullup ingerlanerani nikittarneri amerlapput. Taava fagit ikilisuuppata taakkua nikittarnerit ikilissasut neriussinnaavunga, taamaasillutik aamma sivisunerusumik fagi ataaseq sammisinnaassavaat. 

Nunani allaniittunut sanilliukkaanni atuartitsissutit amerlavallaartut

Meeqqat atuarfiini atuartitsissutit nunani allaniittunut sanilliukkaanni amerlavallaarput, Mitdlarak Lennert naliliivoq,

– Assersuutigisinnaavarput, Danmarkimi fagit assigiinngitsut quliupput. Canadami Nunavumi fagit sisamat sapaatip akunnerani aalluttarpaat. Norgemi aamma sapaatit akunneranni sisamat pinngitsooratik pisartussaavaat, taava 7. klassenngortinnatik fagit allat arfinillit aqqusaartussaallugit. Nunanut allanut sanilliussagaanni, nunatsinni fagit amerlapput, Mitdlarak Lennert taama oqarpoq.