Ilinniartitaanermut Naalakkersuisoq: Nukarlerni atuartitsissutit ikilineqassapput

Meeqqat Atuarfianni atuartut kalaallisut atuffarinnerulerlutillu oqallorinnerulertariaqarput. Taamaammat atuarfimmiinnermi maannakkumiit sivisunerusoq piginnaasassanut taaakkununnga atorneqartassapput, ilinniartitaanermut kultureqarnermullu naalakkersuusoq Nivi Olsen taama oqarpoq.

Allattoq Miki Fleischer

juulip 14-at 2025 16:56

Atuartut nukarlernut atuartitsissutit maanna 13-iupput.

Amerlavallaarput, atuartullu oqaatsinik piginnaasaannut akornutaalluni, Nivi Olsen taama isumaqarpoq.

- Kalaallisut oqaatsigut sanngiiffigivagut meeqqat atuarfianni, Nivi Olsen oqarpoq.

Tamanna nukarlerni atuartunut atuartitsissutit ikilernerannik kinguneqassasoq, naalakkersuisoq isumaqarpoq.

- Una kissaatigalutigu oqaatsitsinnik allassinnaaneq atuarsinnaanerlu nukittorsassuagut. Allanik faginik piginnaasassanillu siunissami ilinniartinneqarnerminni toqqammavissaat inisseqqaarusuparput. Atuarsinnaaneq aammalu oqaatsitsinnik atuisinnaaneq.

Meeqqat atuarfianni ilinniartitsisunut oqilisaaneq

Taama allannguiniarnermut kalaallinik iliniartitsisussaaleqineq peqqutaavoq.

–Ilinniartitsisunik amingaateqarnerput ajornartorsiut angisuujuvoq. Taamaammat nukiit eqqortumik atornissai kissaatingaarput. Ilaatigut taakku fagerpassuit ukiuni siullerni pingasuni, atorneqartut ikilisinnerisigut nukissamik tunisissuugut.

Ilinniartitissuterpassuillu ikilinerisigut ilikkagassat ikinnerulerpata ilinniartitsisut ilinniartitsissutigigunikkit naammassisagissaarnerussasut Nivi Olsen isumaqarpoq.

-Ilinniartitsisut nukissaalatsitsisut isumaqarpunga aamma taakkununnga tulluartuusoq. Ulikkaavillugu ulikkaarlugu ulloq siulleq, sapaatit akunnera siulleq, meerarpassuit qasutillugit aammalu ilinniartitsisut qasutillugit ingerlaneq, angummanniaannarnerlu taanna unitsittariaqaratsigu iliuuseqarfigissuarput.

Suleqatigiinneq annertuneq

Atuarfiulli tunniusassai taama allanngortigissappata susassaqartut allat suleqatigineqartariaqarput.

Meeqqat atuarfianni nukarlernut atuartitsissutit ikiliniarnerannut Ilinniartitsisut Meeqqat Atuarfianneersut Kattuffiat, Ilinniartitaanermut Aqutsisoqarfik aamma kommuneqarfiit immikkut suleqatigissallugit Nivi Olsen pilersaaruteqarpoq.

-Sukkanerpaamik allannguinissaq kommunit peqatigeqqissaarlugit anguniassuarput. Assersuutigalugu meeqqat fagii taakku pinngittoorsinnaasaat ukiut siulliit pingaarnersiueqqissaarluta atuutilernissaa kissaatigivarput.

Atuarfik pillugu Inatsisartut inatsisaat 2012-meersoq naapertorlugu nukarlerni atuartut kalaallit qallunaallu oqasiinik, inuiaqatigiilerinermik, oqaluttuarisaanermik kiisalu upperisalerinermik isumalioqqissaarnermillu atuartinneqartussaapput.

Aamma allamiut oqaasiinik, soorlu tuluit oqaasiinik, meeqqat piginnaasaat inerisarneqassapput.

Aamma matematikkimik pinngortitalerinermillu ilinniartinneqassapput.

Inuttut inerikkiartorneq aamma sammisassavaat.

Kiisalu mernguernartulerineq sammisarissallugu. Tassani eqqumiitsuliorneq, timersorneq kiisalu atuartitsissutit akimorlugit nipilersornermi aamma assassornermi ilusilersuinermilu ingerlatsinerit pineqarput.

Atuartitsissutit sorliit peerneqassanersut suli aalajangiunneqanngilaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.