Assit takukkit: Jens-Frederik Nielsen aamma Múte B. Egede angerlarput
Jens-Frederik Nielsen (D) aamma Múte B. Egede (IA) USA-meereerlutik Jens-Frederik Nielsenillu issittumi isumannaallisaaneq pillugu isumaqatigiissummi Amerikamiut præsidentiat Donald Trump danskillu ministeriunerat Mette Frederiksen (Socialdemokratiet) ippassaq atsioqatigereerlugit pingasunngornermi angerlarput.
Jens-Frederik Nielsen aamma Múte B. Egede Nuup qeqqanut Katuamukannginnerminni mittarfimmi inuppassuarnit tikilluaqquneqarput.
Isumaqatigiissut suleqatigiissitanit suliarineqartoq ippassaq marlunngornermi ualikkut atsiorneqarpoq.
Jens-Frederik Nielsen Múte B, Egedelu mittarfimmi tikittarfimmiit anillakkamik Erfalasut arlallit takugamikkit attortisimaarput.
- Qujanarujussuaq maaniikkassi nuannaarpunga attortisimaarpunga, Jens-Frederik Nielsen oqarpoq.
- Tamatta nammalluta nunarsuaq pissaaneqarnerpaaq ornillugu killiliiartortoqarmat qujanarujussuaq, taanna oqarpoq.
- Múte akisussaaffimmik angisoorujussuarmik tigusivutit qujanarujussuaq, taanna oqarpoq.
Atorfilittat ulloq unnuarlu sulisimasut aamma qujassuteqarfigai.
- Ukiut marluk sinnerlugit sineqaratik sulisarput, allaat eqqaaginnarlugit attortittarpunga, Jens-Frederik Nielsen oqarpoq.
Múte B. Egede tapersiivoq
- Ataatsimooraangatta sunaluunniit akiorsinnaasarparput, Múte B. Egede oqarpoq.
USA-lu nunatsinniinniaruni kalaallit peqatigisariaqaraat naqissuserlugu oqaatigaa.
Kaffillernermut tusagassiortunillu katersortitsinermut
Taakkua tikissimatsiaannaq mittarfimmiit Katuamut ingerlaqqipput, tassani tusagassiortunik katersortitsissallutik. Múte B. Egedep Jens-Frederik Nielsenillu isumaqatigiissut pillugu oqaaseqarnerat inuppassuit kaffisoriaataa tusarnaariarpaat.
‘Kalaallit peqataatinneqartuarnissaat’ Jens-Frederik Nielsenip arlaleriarluni erseqqissaatigaa.
- Isumaqatigiissut 1951-imiinngaanniit illersornissakkut isumaqatigiissut qaavatigut isumaqatigiissusiorneruvoq, Jens-Frederik Nielsen oqarpoq.
- Kalaallit Nunaat atsioqataavoq taamaammat aamma isumaqatigiissutip naqissuserpaa Kalaallit Nunaannut iluaqutaassasoq illersornissakkut allatigullu iliuuseqartoqassappat, taanna oqarpoq.
- Nunat pingasuulluta akunnitsinni isumaqatigiissutigineqassaaq qanoq iliortoqarumaarnersoq, taanna oqarpoq.
Múte B. Egede taperseeqqittoq:
- Inuiaat kalaallit namminersorneq pillugu inatsimmi periarfissatik atorlugit nammineq ikaarsaassagunik natomi ilaasortaanissaminnik toqqammaviliillutik nalunaarput.
USA qanorluunniit pissaaneqartigigaluarpat isumaqatigiissummi ataqqeqatigiittoqarnissaa, kalaallillu kulturikkut aamma ataqqineqarnissaat isumaqatigiissummi allaqqasoq Jens-Frederik Nielsenip erseqqissaatigaa.
Innuttaasullu annilaangassuteqarpata paasisinnaalluarnerarpai.
- Paasisinnaavara inuk taama pissaaneqartigisoq oqariartuutit peqqarniittut anikkaangamigit toqqissiviilliortartut inuiaat, Naalakkersuisut siulittaasuat oqarpoq.
Isumaqatigiissummilu nunatta nammineq aalajangiisinnaassuseqarnera ataqqineqartoq erseqqissaatigaa.
