Jens-Frederik Nielsen: Isumaqatigiissummi qanoq allassimasoqarnersoq ilisimanngilara
Naalakkersuisut siulittaasuata Jens-Frederik Nielsenip tusagassiortunut nunat tamalaaneersunut sassarnermini, ikittuunngitsunik sisamanngornermi ualikkut najuuttoqarpoq.
Siulittaasup nalunaarutaa erseqqippoq:
- Oqaloqatiginnikkusuppugut, aqqutilli eqqortut aqqutigineqassapput, ataqqeqatigiittoqassallunilu.
Aamma isumaqatigiissut Amerikap præsidentiata pingasunngornermi unnukkut nalunaarutaa oqaaseqarfigaa:
- Isumaqatigiissummi qanoq allassimasoqarnersoq ilisimanngilara, siulittaasoq oqarpoq.
Suleqatigiissitanik sapaatip-akunnera kingulleq pilersitsisoqartoq, tusagassiortunut sassarnermi arlaleriarluni erseqqissaatigaa, isumaqatigiissummullu tunngavissanik suliaqarnissani qilanaaraa.
Tassa Trumpip Mark Ruttellu pingasunngornermi isumaqatigiissutaat.
Jens-Frederik Nielsenip Issittup isumannaatsuunerunissaa pillugu, nunatsinni sakkutuunik najuuttoqarnerulernissaa piareersimaffigineqartoq, takkuttorpassuarnut oqaatigaa.
- Issittumi suliniutit pingaaruteqartut, tassunga Natop Kalaallit Nunaanni ataavartumik suliaqalernissaa aamma sakkutooqarnikkut najuuttoqarnerulernissaa sungiusartoqarnerulernissaalu ilanngullugit aqqutigalugit sillimaniarnermut nukittorsaarusuppugut, taanna oqarpoq.
Kunngeqarfik toqqarparput
Kalaallit Nunaat suli ilungersunartumiittoq, Kalaallit Nunaatalu Kunngeqarfik toqqaraa, isertuunnagu oqaatigaa.
- Kunngeqarfik toqqarparput, EU toqqarparput, aamma Nato toqqarparput, taanna oqarpoq.
Vivian Motzfeldtip Lars Løkke Rasmussenillu USA-mik ulloq sioqqullugu ataatsimeeqateqannginneranni, Mette Frederiksen peqatigalugu Danmarkimi tusagassiortunut sassarnerminni taamatut siullermeerluni oqarpoq.
Tusagassiortunut sassarnermi tusagassiortunit apersorneqarsinnaanngormat, ‘isumaqatigiissummut tunngavissaqalermat’ Kalaallit Nunaat isumannarunnaarnersoq aperineqarpoq.
- Tiguaaniarlutik sioorasaarinerit tusartuartillutigit tamanna ajornartorujussuuvoq. Sunilluunniit ippassamut mattussisinnaanikuunngilagut.
- Kalaaliullusi takorloorsiuk, inuiaat eqqissisimasut, kiffaanngissusinnik tigusiniartumik ullut tamaasa takusarlusi, Jens-Frederik Nielsen oqarpoq.
Oqaloqatigiinneq ataqqeqatigiiffiusoq
Issittumi sillimaniarnerusoqarnissamik pilersitsinissaq pillugu Kalaallit Nunaat oqaloqatigiinnissamut piareersimasoq, tamannali ataqqeqatigiissumik pissasoq arlaleriarluni Taassuma erseqqissaatigaa.
Tusagassiortunut sassarnerani, Donald Trumpip tusagassiorfik atornerusaa Fox News najuuppoq.
Taakku tusagassiortuata missilinut illersuut Golden Dome Trumpip Kalaallit Nunaanniitsikkusulluinnagaa, Jens-Frederik Nielsenip qanoq isumaqarfigineraa apeqqutigaa.
- Suleqatigiissitap illuatungeriit marluk aaqqiissuteqarnissaanik qaffasissumik suliaqartup suliamik ingerlatitseqqinnissaa qilanaaralugu oqaatigisinnaavara, Jens-Frederik Nielsen akivoq.
