Issittumi tuttut ikileriarujussuarnissaannik ilisimatusartut ilimasaaripput

Nunarsuup kissatsikkiartornerata Issittumi tuttut amerlassusaat appariartissavaat. Taamak Københavns Universitetimit mississuinermi inernilerneqarpoq. 

Amerikap avannaani ajornerpaarpaassaaq.

- Piffissani nunarsuup kissatsikkiartupiloorfiginikuusaani tuttut amerlasusiat malunnaatilimmik appariartarneri misigineqartarpoq.

Taamak misissuinermi ilisimatusartut ilaat København Universitetimeersoq aamma University of Adelaidemeersoq Elisabetta Canteri oqarpoq.

- Siunissami silap pissusiata allanngoriartornerata kingunerisaanik, ukiuni qulikkuutaani tulliuttuni annaaneqassangatinneqartut, siornatigut takunikuusatsinniit qularnanngitsumik ilungersunarnerussasoq, taanna oqarpoq. 

Ineriartorneq illuatungaanut saatinneqassappat iliuuseqartoqarasuartariaqartoq, misissuinermi ilisimatusartut naliliipput.

Tamanna pinngippat issittumi inuiaqatigiit inuuniarnermikkut atugaat inuunerissaarnissaallu annikillissaaq.

Tamatuma saniatigut qeriuaannartup masarsuani pinngortitami ataqatigiinnermut malunnaatilimmik kinguneqarsinnaavoq.

Kulturi sunnerneqassaaq

Gassimik aniatitsinerit malunnaatilimmik annikillisinneqanngippata Amerikap avannaani tuttut amerlassusiat 80 procenti angullugu, ukioq 2100 angutinnagu appariaateqassasut ilisimatusartut naatsorsuusiaasa takutippaat.

Tamanna ajornartorsiutaavoq, tassami tuttu nerisassanut kulturimut kinaassutsimullu tunngatillugu inuiaqatigiit ilaannut pingaaruteqarluinnartuummat.

Taamaattumik tuttukinnerunera inuiaqatigiinnut annaasaqaataassaaq, University of Adelaidemi lektori Damien Fordham oqarpoq.

Tuttut amerlassusianut nakkutiginninnermut attassiinnarnissamullu aningaasaliigasuartoqarnissaa pisariaqartoq, pingaartumik Amerikap avannaani, taanna oqarpoq.

- Issittumi tuttup piuinnarnissaannut issittumilu pinngortitap ataqatigiinneranut tuniseqataasarneranuinnaanani, kisianni aamma inuiaqatigiippassuarnut tuttunik pinngitsuuisinnaanngitsunut, inuuniarnikkut atugaannut inuunerissaarnissaannullu attassiinnarnissamut iluaqutaassaaq, taanna oqarpoq.