Inuusuttut Ataqatigiit: Akuersaanngilluinnarnerup atorunnaarsinneqarnissaa pillugu oqaluuserisassaq peerneqarli

Inuusuttut Ataqatigiit isumaqarput uranitalinnik piiaanissamik akuersaanngilluinnarnerup atorunnaarsinneqarnissaa pillugu aalajangiinissamut ullut 27-it naammanngitsut.

Allattoq Simon Uldum -

septembarip 13-at 2013 04:41

Inatsisartut ukiakkut 2012-mi aalajangernerannik tunngaveqartumik arlaannaanulluunniit attuumassuteqanngitsumik urani pillugu nalunaarusiaq septembarip 12-iani 2013 kiisami Naalakkersuisut nittartagartik aqqutigalugu siammarterpaat. Nalunaarusiaq uranimik allanillu aatsitassanik qinngornernik ulorianartunik akulinnik piiaanissamut akuersaanngilluinnarnissamik politikkeqarnerup atorunnaarsinneqarsinnaanissaanut imaluunniit allanngortinneqarsinnaanissaanut tunngatillugu pissutsit pillugit imaqarpoq.

Taannalu nalunaarusiaq 91-inik qupperneqartoq Naalakkersuisut isaannit qinikkat ullunik 27-iinnarnik periarfissillugit uranimut aatsitassanullu ulorianartunik qinngornilinnut attueqqusinngilluinnarnissap atorunnaarsinneqarnissaannut isummeqquaat.

- Inuusuttut Ataqatigiit isumaqarput taamatut iliuuseqarneq oqartussaaqaataanermut paasinnittaatsimut naammassinninngilluinnartoq.Tamannalu tunngavigalugu Inuusuttut Ataqatigiinniit piumasaraarput Inatsisartuni nultolerancep atorunnaarsinneqarnissaannut Naalakkersuisut oktobarip 8-ni siullermeerinissartik tunuartilluinnartariaqaraat, Inatsisartummi suli nalunaarusiaq oqallisigalugulu naliliiffiginngimmassuk, Inuusuttut Ataqatigiinni siulittaasup tullia Jane Petersen taama allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.