Imigassamut politikkimut nutaamut inassuteqaatit assigiinngitsunik isumaqarfigineqartoq
Meeqqanut Inuusuttunullu Naalakkersuisup, Maasi Pedersenip (IA) kiisalu Peqqinnissaq Inuit Innarluutillillu pillugit Naalakkersuisup, Anna Wangenheimip (D) nunatsinni allamik imigassamut politikkimik sukannernerusumik kissaateqarput. Taakkulu inassuteqaatit 18-it saqqummiuppaat.
Imigassanik pisisinnaanermut ukiutigut killiliussap 18-init 21-nut qaffanneqarnissaa, arfininngornikkut imigassarsisoqarsinnaajunnaarnissaa, aamma imigassarsinerup akisunerulernissaa ilaatigut inassuteqaatigineqarput.
Innuttaasut aperigaanni imigassamut politikkimut inassuteqaammi pitsaaquteqarlunilu iluaqutissartaqarpoq.
Aqqalunnguaq Olsenip imigassamik pisisinnaanermut sassaallerfigineqarsinnaanermullu ukuit qaffanneqarnissaat isumatsialaasoraa.
- 18 taanna ingerlareertoq aamma ajoquteqanngikkaluartoq kisianni massakkut inuusuttut amerliartoramik pisiniariaannaallutik, taanna oqarpoq.
Taassuma arfininngornikkut imigassarsisoqarsinnaajunnaarnera kikkunnut tamanut aamma pitsaasuussasoraa.
- Tassa ajunngilaq freerfinni inuit eqqissisimanissaat aamma taanna angorusunnartorujussuuvoq.
Aqqalunnguaq Olsenip akinik qaffaaneq innuttaasunut aamma iluaqutaassanerarpaa.
- Taana torragissavara aamma akii immiaaqqat viinnit tamakkulu sakkortunerit akii qaffappata imaassinnaasoq taanna iluaqutaasoq. Sipaarniarnissaq ingammik meerartallit eqqarsaatigalugit, taanna oqarpoq.
Aqqalunnguaq Olsenip inassuteqaatit nutaat iluaqutaanissaat neriuutigaa, isumaqataangitsoqassappalli paasisinnaanerarpaa.
- Taakkuupput aamma aalajangiisussat, taanna oqarpoq.
KNR-imit oqaloqatigisatta ilaat, Ane Lundblad allatut isumaqarpoq.
Taassuma ukiutigut killissarititaasunut qaffaanissaq isumaqatiginngilaa.
- Akerlerisinnaavara immaqa soorlu inuusuttuulluni 18-iliilluni imertalerneq aamma nuannertuusarmat, taanna oqarpoq.
Taassuma imigassap arfininngornikkut matuneqarnissaa aamma isumaqatiginngilaa. Ane Lundbladip inuusuttut malittarisassanik sukaterisoqarneratigut ukkatarinnittoqarnerulerneratigullu inuusuttut pileriginninneruliinnassasorai.
- Killilersuingaarmata ilaa soqutigilerpaat. Soorlu asseraluaramikkit soqutiginerulerpaat imigassat suusut allaat paasillugit, taanna oqarpoq.
Ane Lundbladip imigassamik killiliineq kukkusuusoraa, atornerluisummi allamik aqqutissarsiuinnassasorai.
Marie Regine Kruse ukiutigut qaffaanissaq ajoriffissaqartinngilaa.
- Uku 18-inik ukiullit suli ukiukippallaaramik, taanna oqarpoq.
Taassuma imigassamik tuniniaanermik arfininngornermi matusisoqarnissaa ajorinngilaa, inuit taamaalillutik sunngiffimminni qasuersaarsinnaassammata.
